Prezidente Asosiasaun Jornalista Timor Leste no Timor Leste Press Union, Zevonia Vieira no Manuel Pinto. Imajen/Antonio Goncalves

DILI, 26 marsu 2020 (TATOLI)–Asosiasaun Jornalista Timor Lorosa’e (AJTL) ho Timor Leste Press Union (TLPU) kontinua husu ba Governu liuhosi Ministériu Saúde (MS) atu kria sentru mídia ida ba COVID-19 iha Timor-Leste hodi jornalista sira bele kobre informasaun ho loloos.

Portavós AJTL-TLPU, Zevonia Vieira hateten, COVID-19 sai ona pandemia ba mundu tomak no komesa afeta ona ba Timor-Leste. Situasaun ne’e halo públiku preokupa tanba moras at ne’e globalmente ameasa daudauk vida umana.

“Bazeia ba situasaun sira ne’ebé mak temi iha leten, Asosiasaun Jornalista Timor Lorosa’e no Timor Leste Press Union hakarak husu ba Governu liuliu Ministériu Saúde ka komisaun COVID-19 katak atu kria sentru mídia ba COVID-19, atu nune’e bele fornese informasaun loloos no klean ba mídia iha periódu propagasaun COVID-19 nian,” dehan Portavós AJTL-TLPU, Zevonia Vieira, ba jornalista sira liuhosi konferénsia imprensa iha Salaun Borja da Costa, Farol, Dili, kinta ne’e.

Nia haforsa tan, komisaun COVID-19 tenke koopera ka kria relasaun di’ak ho jornalista sira hodi nune’e fó espasu nakloke ba jornalista sira atu husu pergunta kona-ba asuntu COVID- 19 ne’ebé da’et ona mai iha Timor-Leste.

“Komisaun COVID-19 ne’ebé lidera husi MS tenke halo tratamentu justu ba jornalista ka mídia hotu-hotu, tantu mídia públiku ka mídia privadu bainhira realiza konférensia imprensa ruma”, nia hateten.

Nia husu atu respeitu independénsia redasaun kanál mídia hotu-hotu no labele orienta fali kanál mídia sira atu halo tuir interese seluk nian ka interese ema ema-nian tanba públiku ezize mídia atu toma nia papél nu’udar ajente informasaun atu hakonu públiku nia direitu asesu ba informasaun.

Asosiasaun Jornalista Timor Leste no Timor Leste Press Union halo preskomferens relasiona ho kobertura konaba virus corona.Imajen/Antonio Goncalves

“Iha kontestu publikasaun mídia nian, públiku ezize mídia atu toma nia papél nu’udar ajente informasaun atu hakonu públiku nia direitu asesu ba informasaun. Maibé iha periódu propagasaun COVID-19 nian, jornalista sira hasoru barreira oin-oin atu hetan informasaun ida-ne’ebé loloos no kredível, liuliu atu hetan informasaun ofisiál husi komisaun COVID-19 ne’ebé lidera hosi Ministériu Saúde (MS) no Organizasaun Mundiál Saúde (OMS),” nia dehan.

Entretantu, nia hateten, AJTL-TLPU husu mós ba Mídia ka meius komunikasaun sosiál katak atu halo serbisu ho sériu no prepara ekipamentu protesaun ba jornalista sira, bainhira halo kobertura iha espasu públiku, hodi nune’e labele fó risku ba ornalista sira-nia moris.

“Fo nafatin kondisaun di’ak ba jornalista sira bainhira halo ninia knaar jornalizmu iha terenu, liuliu iha periódu propagasaun moras COVID-19 nian,” nia dehan.

Tanba ne’e, AJTL-TLPU husu jornalista sira tenke kumpre nafatin kódigu Étika jornalisitiku, bainhira halo kobertura ba asuntu Covid-19.

Nia husu ba redasaun no jornalista sira hotu halo Konfirmasaun no verifikasasaun ba informasaun hotu-hotu, tantu informasaun ofisiál hosi governu nomós informasaun sira ne’ebé públika iha mídia sosiál antes publika.

“Jornalista labele fiar de’it ba fonte ofisiál sira, maibé halo mós peskiza no halo investigasaun, nune’e bele públika informasaun ne’ebé dieferente husi fonte ofisiál sira,” nia haktuir.

Tanba, nia dehan, redasaun no jornalista sira atu kontinua públika ka tranzmite notísia sira ne’ebé iha relasaun públiku nia interese, liuliu notísia sira kona-ba COVID-19 no dezastre naturál.

“Relasiona ho asuntu Covid-19, AJTL-TLPU husu públiku atu labele fiar informasaun falsu ne’ebé ema irresponsável sira sempre tranzmite iha rede mídia sosiál hodi kria situasaun la hakmatek no pániku iha sosiedade nia leet. Nune’e mós labele fahe tutan informasaun falsa ka hoax no fake news ne’ebé espalla iha mídia sosiál relasiona ho COVID 19,” nia esplika.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here