Coronavirus

DILI, 26 marsu 2020 (TATOLI) – Diretora Servisu Munisipál Saúde Manufahi, Florência Cortereal Tilman, konfirma abitante Manufahi na’in-tolu, daudaun ne’e ninia parte halo hela kuarentena durante loron-tolu no ikusmai ho kondisaun saudável no seidauk hatudu sintoma ruma hanesan isin manas no mear, ne’ebé suspeita ba COVID-19.

Diretora ko’alia asuntu ne’e, relasiona ho deklarasaun husi Primeiru-Ministru, Taur Matan Ruak iha Parlamentu Nasionál, ne’ebé relata katak tuir dadus husi Vise-Ministra Saúde, Élia António de Araújo  dos Reis Amaral, katak daudaun iha ona suspeitu ida iha Munisípiu manufahi, ne’ebé mai husi rai-sorin.

Abitante ne’e nu’udar estudante ne’ebé fila hosi Bali, Indonézia ho aviaun, enkuantu na’in-rua seluk fila hosi misaun relijioza nian Sulawesi, Indonézia ho dalan ilegál liuhosi fronteira.

Notísia Relevante: PM Rekoñese Sistema Saúde Timor-Leste Mínimu Tanba ne’e Presiza Estadu Emerjénsia

“Sira to’o tiha mai (Manufahi) ha’u mós lahatene no iha dadersan maka Administradór informa mai ha’u katak ami ba lori sira hodi mai iha Sentru Saúde tanba autoridade lokál sira preokupa katak orsida kuandu iha moras karik bele hadaet ba populasaun hotu. Entaun ami ba foti no halo prosesu naruk mak sira foin atu mai. Ami lori tiha no halo tuir saúde nian padraun, hodi halo teste ba sira no ami só bele teste sira nia kondisaun de’it hanesan isin manas. Ami só teste baibain de’it maibé teste ba rán ami labele halo”, informa Diretora Florência ba Agência Tatoli via telefónika, kinta ne’e.

Responsavél ne’e adianta, ba kestaun ne’e sira labele foti amostra hosi sidadaun na’in-tolu ne’e tanba la deskonfia sira hetan sintoma ruma relasiona ho moras COVID-19.

“Foti ema nia amostra bainhira ema ne’e iha ona mear ka inus-been, maibé bainhira ema ne’e normál ne’e mak foti mós orsida ladi’ak, ne’ebé ami halo observasaun de’it hodi haree tanba sira iha kuarentena tiha durante loron-tolu ona maibé lamosu sintoma ruma no ami observa haree koko sira nia tensaun no temperatura no sira nia kondisaun normál”, nia akresenta.

Durante kuaretena, pesoál saúde sira fó hahán, deskansa no akonsella sira hodi fase liman bebeik no labele besik família.

Pesoál saúde mós akompaña timor-oan na’in-tolu durante oras 24 no pesoál saúde sira halo rotasaun hodi fó asistensia ba sira.

“Timor-Leste iha ona kazu ba COVID-19 na’in-ida, Vise-Ministra Saúde foin aviza katak ita daudaun ne’e suspeitu ida iha Munisípiu Manufahi katak mai husi rai-sorin balun”, deklara PM Taur.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here