BATUGADE, 25 marsu 2020 (TATOLI)- Unidade Polísia Fronteira (UPF) fó apoiu kolxaun 100 ba Ekipa Médiku Jerál Ministériu Saúde Postu Integradu Batugade, Postu Administrativu Balibo, Munisípiu Bobonaro, hodi estabelese fatin kuarentena provizóriu iha fatin Merkadu Tradisionál.
Notísia Relevante : MS Hahú Instala Kuartu 300 iha Kuarentena Batugade
Komandante UPF, Superintendente João Belo dos Reis dehan, apoiu ne’e sira-oferese, tanba haree ba preparasaun ekipa Ministériu Saúde iha Postu Batugade mínimu tebes, nune’e sira-deside fó kolxaun ne’e para atende Timoroan ne’ebé halo movimentu mai husi Fronteira Motain-Indonézia depois submete ba teste médiku bele uza hodi toba iha fatin ne’e durante loron 14.
“Kolxaun 100 ne’e UPF maka fó hodi ita bele ajuda servisu Ministériu Saúde iha Postu Integradu Batugade bele estabelese fatin kuarentena provizóriu,” dehan Komandante UPF, João Belo dos Reis ba Ajénsia Tatoli iha Postu Integradu Batugade, tersa (24/03/2020).
Alende apoiu sasán sira ne’e, UPF koopera ho ekipa Bombeiru Munisípiu Bobonaro, ajuda fase moos fatin kuarentena no hamoos duut hodi harii tenda COVID-19 ne’ebé apoiu hosi International Organization for Migration (IOM).
Notísia Relevante : UPF Halo Apreensaun Ba Ema Na’in 20 Tama Ilegál Mai TL
UPF koloka mós membru-sira hodi asegura seguransa iha fatin kuarentena tuir desizaun Governu Timor-Leste.
Nia dehan, sidadaun-sira ne’ebé tama ilegál iha fronteira Timor-Leste UPF kaptura no sei entrega hotu ba ekipa COVID-19 hala’o teste ba sira-nia saúde para evita no prevene moras pandemia Coronavirus ka COVID-19.
Iha fatin hanesan, Vise Ministru Saúde ba Dezenvolvimentu Estratéjiku Saúde (VMDES), Bonifácio Maukoli dos Reis hato’o agradese ba UPF ninia apoiu hodi ajuda servisu Ministériu Saúde.
Nia dehan, Governu koordena ona ho Kompañia Nasionál sei hadi’a kondisaun kuarentena hodi monta ekipamentu saúde no destaka rekursu pesoál Saúde hodi fó asisténsia ba Timoroan ne’ebé sei hela iha fatin kuarentena.
Jornalista : Eugénio Pereira
Editór : Francisco Simões
