Airnorth to’o iha Aeroportu Internasionál Prezidente Nicolau Lobato, Comoro. Imajen Tatoli/António Gonçalves

DILI, 25 marsu 2020 (TATOLI)-Timoroan hamutuk ema na’in 34, iha kuarta (25/03/2020)fila hosi Austrália mai Timor-Leste, maibé pesoál Vijilánsia Saúde ne’ebé destaka iha Aeroportu Internasionál Nicolau Lobato Comoro Dili, la deteta sira balun mai ho sintoma Coronavirus ka COVID-19.

Pasajeiru Timoroan hirak ne’e kompostu hosi mane 18 no feto 16 to’o iha Aeroporto Comoro ho aviaun Air North mazumenus tuku 11:40 Otl.

Doutora ne’ebé destakadu iha Aeroportu Dili, Lisete Vong Pereira, relata pasajeiru hirak ne’e ho kondisaun saúde di’ak hotu hafoin halo teste ho thermoscan hodi koko sira-nia temperatura isin.

“Pasajeiru sira ohin ne’e sintoma di’ak hotu laiha ida mak hetan moras, maibé sira tenke ba lai iha kuarentena,”tenik Lisete.

Tuir informasaun Provizóriu Timoroan 34 ne’e obrigatóriu tenke tama Kuarentena durante loron 14 ne’ebé tuir planu sei tau iha Insititutu Nasional Administrasaun públika (INAP) Comoro Dili.

Entretantu, hosi total pasajeiru 34 ne’e, na’in lima hanesan bolseiru hosi Kompaña Conocophillips, na’in tolu hanesan pasiente ne’ebé antes ne’e halo tratamentu saúde iha rai-li’úr no restu hanesan traballadór.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here