Traballadór sira husi Austrália to’o iha Aeroportu Comoro ho Aviaun Airnorth, kuarta (25/03).Imajen Tatoli/António Gonçalves

DILI, 25 marsu 2020 (TATOLI) – Timor-oan hamutuk na’in-34, ne’ebé mai husi Austrália ladún kontente ho atendimentu Ministériu Saúde (MS) nia, liuliu ekipa Task Force ba COVID-19, tanba hein kle’ur iha Aeroportu Comoro hafoin desloka ba kuarentena iha edifísiu Institutu Nasionál Administrasaun Públika (INAP).

Timor-oan na’in-34 ne’e kompostu husi mane na’in-18 no feto na’in-16, foin fila husi Austrália ho aviaun Airnorth, iha tuku 11:40 oras Timor-Leste.

Timor-oan ne’ebé nu’udar traballadór Seasonal Workers Programme (SWP), Sidonio Soares de Jesus, lamenta ho atedimentu Ministériu Saúde nia tanba hein kuaze oras tolu resin iha Aeroportu Comoro atu desloka ba fatin kuarentena.

Inisiativa ba kuarentena ne’e, bazeia ba desizaun Governu ne’ebé hateten sidadaun foin mai husi nasaun ne’ebé afetadu COVID-19, tenke kuarentena durante loron 14 nia-laran, hafoin filafali ba rezidénsia.

“Ami preokupa hasoru programa kuarentena ne’ebé mak Ministériu Saúde hasai liuhosi programa Organizasaun Mundiál Saúde katak, sidadaun ne’ebé mai husi nasaun afetadu COVID-19 tenke ba hela iha kuaretena, maibé ami mai ona abandona de’it ami iha Aeroportu,” tenik Traballadór SWP ba Agência Tatoli, iha Aeroportu Comoro, kuarta ne’e.

Traballadór Timor-oan ne’e adianta, nu’udar sidadaun, nia parte prontu atu kumpre saida maka Governu fó sai liuhosi MS tanba lakohi lori vírus ne’e afeta fali populasaun, liuliu família sira.

“Ami haree hanesan ohin akontese iha Aeroportu, ami ne’ebé mak fila husi Austrália landing iha mais ou menus meudia tuku 12:00, maibé hafoin pasa revista husi Ministériu Saúde, dehan tenke hein atu ba kuarentena ne’ebé mak Governu prepara ona. Ami prontu atu kumpre tamba ida ne’e di’ak ba ami no di’ak ba família, inklui kolega no ba ema hotu ne’ebé mak iha ita nia-rain”, nia afirma.

Maibé, nia salienta, timor-oan na’in-34 tenke hein fali transporte iha área Aeroportu nian durante oras tolu to’o hamlaha no hamrook no laiha ema ida maka resposabiliza.

“Ami komprede ba ita-nia situasaun ne’ebé mak agora daudaun ita hasoru, maibe pelu menus komisaun organizadora favór prepara antes atu ami mai labele hein hanesan ne’e. Ha’u atu hato’o ida-ne’e la’ós krítika maibé hanesan  sujestaun atu nune’e bele hadi’a fallansu sira ne’e”, nia akresenta.

Responde kestaun ne’e, Diretora Nasionál Kontrolu Moras, Ministériu Saúde, Josefina Clarinha João, hateten, iha situasaun emerjénsia hanesan ne’e MS liuhosi ekipa vijilánsia ba COVID-19 kontinua esforsu-an atu koordena no kolabora ho ekipa sira iha Aeroportu atu aselera atendementu ho di’ak ba sidadaun sira husi nasaun afetadu sira.

“Ita mós rekursu umanu no transporte limitadu ne’ebé tenke sai ita nia sasukat, atu presiza pasénsia hodi hein prosesu”, nia dehan.

Diretora ne’e subliña, parte ekipa Diresaun Nasionál Kontrolu Moras maka sei responsabiliza timor-oan sira n’ebé mai husi nasaun afetadu hodi lori ba kuarentena.

“Ami iha pesoál ne’ebé mak ne’ebé limitadu, maibé ami buka nafatin atu koordena tanba ami hatene mai tarde duni tanba hakarak prepara kondisaun kuarentena nian atu timor-oan sira tama ne’e ho kondisaun di’ak no hetan atedimentu di’ak iha ne’ebá”, nia afirma.

Ho nune’e, nia dehan tan, ba oin sei halo koordenasaun di’ak liu ho ekipa sira iha Aeroportu atu prepara kedan fatin ka kuaretena ho ai-han ruma atu timor-oan sira.

MS koloka ema hirak ne’e bá iha Edifísiu INAP maizumenus tuku 02:45, iha kuartu hamutuk 20 kompleta ho ekipamentu sufisiente hanesan toba fatin, bee moos, air conditioner no seluk tan, enkuantu kada kuartu akumula ema na’in-rua.

Entretantu, MS estabelese tan kuarentena iha INAP tanba daudaun ne’e laiha ona espasu iha fatin kuarente hanesan Otél Novo Horizonte Metiaut, Otél Audian, no Tibar.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here