Primeiru-Ministru, Taur Matan Ruak, Prezide Reuniaun Konsellu Ministru Extraordinária iha Sentru Konvensaun Dili, segunda (23/03). Imajen Tatoli/Egas Cristovão

DILI, 25 marsu 2020 (TATOLI) Ministru Interiór ein ezersísiu, Filomeno da Paixão de Jesus no Sekretáriu Estadu Protesaun Sivíl, Alexandrino Xavier de Araújo, aprezenta Proposta Lei kona-ba prinsípiu fundamentál sira husi Lei Protesaun Sivíl ba Konsellu Ministru (KM).

Diploma ne’e define no organiza baze Protesaun Sivíl iha Timor-Leste no destaka ba Autoridade Protesaun Sivíl hanesan autoridade ne’ebé sei fó forma ba sistema hotu husi lei ne’e, no mós define Sistema Nasionál no desentraliza estrutura iha nível rejionál no munisipál.

Maski nune’e, Proposta Lei ne’e sei analiza filafali  no sei aprezenta iha sorumutu Konsellu Ministru tuir mai.

 “Ami mai aprezenta Lei Baze Protesaun Sivíl iha Konsellu Ministru. Ami presiza lei ida tanba instituisaun Protesaun Sivíl foin hahú iha VIII Governu, entaun presiza iha enkuadramentu legál ida hodi sai mata-dalan ba prosesu serbisu Protesaun Sivíl”, hateten Sekretáriu Estadu Alexandrino iha Sentru Konvensaun Dili (CCD, sigla portugés) kuarta ne’e.

Nia haktuir, aprezentasaun iha KM la’o di’ak maibé presiza tan esklaresimentu oituan iha artigu 18, kona-ba asesu ba servisu tanba bainhira iha dezastre oinsá atubele fó apoia ba ema ida hetan dezastre.

“Tanba ne’e maka ami mai halo halo esklaresementu kle’an relasaun ho artigu. Tanba ne’e Primeiru-Ministru fó tempu ba ami no semana oin lori hikas mai hodi hetan aprovasaun”, akresenta Alexandrino.

Governante ne’e adianta, lei baze ne’e iha vantajen boot tebes tanba iha instituisaun ida presiza iha enkuadramentu legál ida hodi sai mata-dalan, tanba Protesaun Sivíl antes ne’e hanesan diresaun jéral ida maibé iha VIII Governu nia tempu tempu sai hanesan Sekretaria Estadu Protesaun Sivíl (SEPS).

Nia refere liután, SEPS ninia volume servisu presiza iha koordenasaun no orientasaun polítika, enkuantu iha orientasau polítika no iha lei ne’e rasik iha artigu 27 maka orientasaun no ordén hotu mai hosi Primeiru-Ministru, tanba ninia koordenasaun ho ministériu sira presiza prevee iha lei atu nune’e iha futuru mai Ministériu idaidak bele hatene ona idaidak ninia servisu.

Entretantu, Lei Baze Protesaun Sivíl kompostu husi artigu hamtuk 55.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here