Prezidente APORTIL, Flávio Cardoso Neves. Imajen Tatoli/Egas Cristovão

DILI, 25 marsu 2020 (TATOLI) – Prezidente Konsellu Administrasaun Autoridade Portuáriu Timor-Leste (APORTIL), Flávio Cardoso Neves, informa, relasiona pandemia COVID-19 ne’ebé la’o daudaun, atu prevene populasaun sira husi vírus ne’e maka Autoridade Portuáriu sei kordena ho Ministériu Transporte no Komunikasaun (MTK) atu haree, nune’e semana oin sei suspende provizóriu Ró Nakroma ninia operasaun husiDili ba Atauru no Dili ba Oé-cusse.

“Hanesan ita hotu akompaña situasaun agora kona-ba kazu Coronavírus rasik, Prezidente Repúblika sei hato’o ninia desizaun kona-ba Estadu Emerjénsia, maibé kuandu seidauk to’o iha ne’ebá maka APORTIL mós tenke foti desizaun ne’ebé maka di’ak atu proteje ita ninian sidadaun rasik. Ha’u sei kordena ho Ministériu Transporte no Komunikasaun atubele suspende lai operasaun Ró Nakroman nian. Ha’u hanoin semana oin ita bele halo ida-ne’e”, nia dehan ba Agência Tatoli iha ninia knaar fatin, Portu Dili, kuarta ne’e.

Nia observa, bainhira mosu notísia kona-ba COVID-19, komunidade sira hakarak ba foho iha segunda liubá no pasajeiru sira barak maka sa’e ba ró, entaun laiha baze legál atu hapara sira tanba ema hotu hakarak ba foho.

“Hanesan horseik pasajeiru hamutuk 400-resin, enkuantu ró ne’e másimu bele tula de’it ema na’in-350. Maibé tula pasajeiru liu fali kapasidade, tanba ema hotu pániku ho moras COVID-19”, Flávio haktuir.

Nune’e, nia adianta katak, atu proteje populasaun sira husi vírus ne’e maka solusaun tenke hapara movimentu ró ne’ebé lori ema bá Oé-cusse tanba vírus ne’e rasik ninian kritériu ne’ebé husi Organizasaun Mundiál Saúde (OMS) fó sai katak tenke iha distánsia dook metru ida entre ema ida ho ema seluk. Tanba ne’e hanesan solusaun sira atubele proteje komunidade sira husi Coronavírus.

“Ha’u mós sei kordena ho Ministru Transporte no komunikasaun, atu iha semana oin provizóriu tenke suspende operasaun Ró Nakroman, nune’e labele iha movimentu husi Dili ba Oé-cusse”, nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here