Imajen tatoli/António Goncalves

DILI, 25 marsu 2020 (TATOLI)—Votasaun ba pedidu ho karáter urjénsia kona-ba proposta alterasaun Lei Orsamentu no Jestaun Finanseira (LOGF-sigla portugés) la pasa iha Parlamentu Nasionál (PN).

Pedidu ne’e ho karáter urjénsia ne’e kona-ba Proposta Lei númeru 12/V (2a)-alterasaun datoluk lei númeru 13/2009, 21 outubru kona-ba Orsamentu no Jestaun Finanseira. Proposta alterasaun ne’e a-favór 31 kontra 33 no abstensaun 0.

Prezidente Parlamentu Nasionál, Arão Noé de Jesus da Costa Amaral, fó-sai katak pedidu ne’e sei kontinua ba Komisaun C hodi debate ho situasaun normál

“Ho nune’e karáter urjénsia la liu, ita baixa ba komisaun C hodi halo fali audiénsia,” Arão Noé hateten.

Deputadu Bankada Parlamentár KHUNTO, Luis Roberto hateten, alterasaun ba lei refere seidauk tempu tanba ne’e presiza debate ho karáter normál.

“Ita hakarak pedidu ida atu halo levantamentu estraordinária ba fundu petrolíferu la’ós alterasaun mak urjénsia,” Deputadu Luis Roberto, informa liuhosi plenária iha Parlamentu Nasionál, kuarta ne’e.

Deputadu Luis Roberto dehan, bankada KHUNTO sei vota a-favór ba pedidu levantamentu maibé ba proposta alterasaun, lae.

Deputadu Bankada Parlamentár PLP, Noé da Silva, afirma, proposta alterasaun ne’e iha fatin no tenke debate ho karáter urjénsia.

“Ha’u dehan iha fatin tanba momentu Orsamentu Jerál Estadu (OJE) la pasa entaun Timor-Leste hasoru situasaun emerjénsia, tanba ne’e alterasaun ne’e merese ho karáter urjénsia,” hateten Deputadu PLP ne’e.

Purtantu Xefe Bankada Parlamentár Partidu Demokrátiku (PD), António da Conçeição “Kalohan” hateten, pedidu ho karáter urjénsia husu halo revizaun ba Lei Orsamentu no Jerál Orsamentu.

Kalohan konsidera pedidu ho karáter urjénsia mai hosi situasaun dilemátika rua, ida iha ámbitu polítiku, ida seluk iha ámbitu jurídiiku.

“Ita iha situasaun rua, iha ámbitu polítiku ezisténsia governu hala’o liu ona prosesu ne’ebé agora sei pendente hela iha Prezidente Repúblika nia liman. Bankada Partidu Demokrátiku husu ita refleta didi’ak ho revizaun ba artigu 31 kona-ba Lei Orsamentu no Jestaun Finanseira, ladún opurtunu atu halo revizaun ba lei estruturante ida. Proposta alterasaun lori ita ba dúvida barak tanba ne’e presiza deskuti iha tempu ne’ebé opurtunu, mas la’ós iha tempu ida,” Xefe Bankada PD ne’e dehan.

Deputadu Bankada FRETLIIN, Maria Angelica Rangel, se aprova de’it mak pedidu levantamentu ne’e responde situasaun atuál ka lae.

“Be uluk ita altera Lei Fundu Petrolífetu (LFP) no Lei Atividade Petrolíferu ne’e bele no lori semana ida de’it nusá mak ida-ne’e labele. Ami FRETILIN apoia atu alterasaun ne’e liu, sé la liu responsabilidade CNRT nian,” Deputada FRETLIIN ne’e hateten.

Purtantu Deputadu FRETILIN, Antoninho Bianco, subliña proposta lei ho karáter urjénsia ne’e tenke aprova ho emerjénsia.

“Levantamentu ne’e limite ezekusaun, entaun Governu labele rezolve problema. Alterasaun 31 ne’e atu responde ba klamidade ne’ebé akontese no liga ba povu nia interese. Ukun atu rezolve problema nia moris. Ha’u fiar katak KHUNTO sei vota a-favor,”  dehan Deputadu FRETILIN.

Xefe Bankada FRETILIN, Aniceto Guterres hateten, la iha lei mak dehan Primeiru-Ministru demisionáriu tanba ne’e alterasaun ne’e pertenente.

“Proposta alterasaun no pedidu levantamentu ne’e importante hotu tanba ne’e distinje buat rua ne’e,” Aniceto fó hanoin.

Deputadu Bankada PD, Mariano Assanami Sabino hateten, urjénsia liu mak pedidu levantamentu la’ós alterasaun lei.

“Ita fó apoia ba pedidu levantamentu, kona-ba alterasaun presiza governu ida normál, tanba ne’e ha’u apoia pedidu ida ba osan ne’e mak ita hotu-hotu apoiu,” hateten Assanami.

Antes ne’e, Xefe Bankada Parlamentár KHUNTO, Deputadu António Nobre Tilman, konsidera pedidu ho karáter urjénsia la pertinente.

“Urjente liu mak ita aprova osan (governu husu pedidu levantamentu ba fundu minarai) hodi sosa ekipamentu hodi hasoru Coronavirus tanba ne’e ami bankada KHUNTO sei vota kontra pedidu ne’e,” hateten Xefe Bankada KHUNTO.

Notísia Relevante: Ohin, PN Deside Destinu Proposta Alterasaun no Ajenda Importante Rua

Jornalista : Evaristo Soares Martins

Editór      : Cancio Ximenes

1 KOMENTÁRIU

  1. Iha situasaun hanesan ne mos imi sei manobra no sumba tan orsamento atu atende situasaun covid-19. Kapasidade klot mos hakrak tur iha Parlamentu.

HAKEREK NO HATÁN

Please enter your comment!
Please enter your name here