Imajen Tatoli/Antonio Goncalves.

DILI, 25 marsu 2020 (TATOLI)—Parlamentu Nasionál (PN) retira projetu rezolusaun númeru 51/2020, kona-ba adosaun medida prevensaun no kombate COVID-19 tanba proponente sira konsidera rezolusaun ne’e la iha ona sentidu.

Proponente ba proposta rezolusaun ne’e mak hanesan Duarte Nunes, Aniceto Guterres no Francisco Vasconselhos.

“Proposta retirada tanba ne’e ita laiha ajenda ba projetu rezolusaun ne’e,” dehan Prezidente Parlamentu Nasionál, Arão Noé de Jesus da Costa Amarál,  liuhosi plenária Parlamentu Nasionál, kuarta ne’e.

Prezidente Parlamentu Nasionál foti desizaun ba projetu rezolusaun ne’e tanba Xefe Bankada Parlamentár FRETILIN, Aniceto Guterres, afirma la presiza debate ona rezolusaun ne’e tanba la pertinente.

Proposta rezolusaun ne’e retira tanba proponente Aniceto Guterres no Francisco Vasconselos deside retira proposta ne’e tanba ho razaun rezolusaun ne’e la iha sentidu.

“Ha’u proponente lori Bankada FRETILIN nia naran hakarak retira ba rezolusaun ne’e tanba la iha sentidu, tanba lei sira-ne’ebé fasilita governu la pasa,” dehan Aniceto Guterres, liuhosi plenária, Parlamentu Nasionál.

Maibé Xefe Bankada Parlamentár CNRT, Duarte Nunes, hanesan mós proponente ba rezolusaun ne’e konsidera Deputadu Aniceto Guterres impoin deputadu sira seluk.

“Atu implementa ne’e ideál tanba Governu mós halo ona rezolusaun hodi prevene ema tama mai, rezolusaun ne’e hasai para ita mós kontribui ba situasaun ne’e. Ne’ebé, ha’u hanoin direitu kolega nian, ita presiza fó hanoin malu maibé tuir demokrasia ema na’in-rua liu ema-ida,” Deputadu Duarte Nunes hateten.

Entretantu, Deputadu Bankada Parlamentár PLP, Francisco Vanconselos, afirma rezolusaun ne’e la presiza debate tanba la iha lei ida atu fasilita Governu hanesan jestaun.

“Ha’u nu’udar proponente retira no kolega sira vota ho konsiénsia,” nia hateten.

Entretantu, Deputadu Bankada FRETILIN, Antoninho Bianco hateten, rezolusaun ne’e relasaun ho pedidu ho karáter urjénsia ba alterasaun Lei Orsamentu no Jestaun Finanseira ne’e.

“Rezolusaun ne’e ita atu fó serbisu todan ba Governu maibé osan la iha. Ha’u hanoin parlamentu labele fó todan ba Governu. Parlamentu tenke fasilita Governu. Ha’u hanoin la presiza rezolusaun barak. ida ne’e ha’u-nia pozisaun mak ne’e labele tau todan liu, ita kesi iha parte seluk. Regra internasionál iha tiha ona lalika halo tán regra iha parlamentu,” Deputadu Antoninho Bianco fó hanoin.

Aleinde ne’e, Deputadu Adérito Hugo da Costa, propoin proposta ne’e di’ak liu diskute ba aban tanba diskute mós estadu emerjénsia iha Parlamentu Nasionál.

Deputada Bankada PLP, Maria Angelina Sarmento, konsidera rezolusaun ne’e la pertenente tanba ne’e la presiza halo diskusaun.

“Konteúdu relevante maibé buat barak realiza tiha ona no fó seriedade ba prevensaun no kombate Coronavirus. Ha’u hanoin rezolusaun ne’e, ita lalika halo tán votasaun,” dehan Deputada Bankada PLP ne’e.

Notísia Relevante: Pedidu Diskusaun Karatér Urjénsia ba Alterasaun Lei Orsamentu no Jestaun Finanseira La Pasa

Jornalista : Evaristo Soares Martins

Editór      :  Cancio Ximenes

HAKEREK NO HATÁN

Please enter your comment!
Please enter your name here