Imajen tatoli/António Goncalves

DILI, 25 marsu 2020 (TATOLI)—Parlamentu Nasionál (PN) aprova pedidu ho karáter urjénsia ba proposta levantamentu hodi fó autorizasaun Governu foti millaun $250 hosi fundu petrolíferu.

Parlamentu Nasionál aprova pedidu ho karáter urjénsia ba proposta lei númeru 13/V(2a)-autorizasaun ba realizasaun transferénsia estraordinária ba fundu petrolíferu. Pedidu ho karáter urjénsia ne’e pasa ho votu a-favór 64, laiha kontra no abstensaun

“Ho nune’e autoriza pedidiu ho karáter urjénsia, ami sei baixa kedas ba komisaun C (Finansa Públika),” Prezidente Parlamentu Nasionál, Arão Noé de Jesus da Costa Amaral, anunsia liuhosi plenária, kuarta ne’e.

Deputadu Bankada Parlamentár Partidu Demokrátiku (PD), Mariano Assanami Sabino hateten, pedidu ne’e mak importante liu hodi fó resposta ba kestaun inundasaun no kombate Coronavirus.

“Ha’u hanoin pedidu ne’e iha nia fatin duni no tenke aprova iha Parlamentu Nasionál, tenke apoia ba levantamentu ba estraordinária hodi hahú implemeta,” Assanami informa liuhosi plenária, Parlamentu Nasionál, kuarta ne’e.

Deputadu PLP, Francisco Vasconselos afirma, loloos ne’e pedidu urjénsia ba proposta alterasaun tenke pakote ho pedidu levantamentu ne’e.

“Millaun $250 ne’e la inklui ona prevensaun ba COVID-19 no inundasaun, tanba proposta alterasaun ne’e ita-boot sira vota kontra tiha ona,” hateten Deputadu PLP.

Xefe Bankada Parlamentár PD, António da Conçeição hateten, pedidu estraordinária ne’e atu responde ba situasaun emerjénsia.

“Ne’e karáter ne’e urjénsia katak presiza osan iha oin duni. Ba ami importante tebes aprovasaun karáter urjénsia no aprova kedas lokraik ne’e. Ita buka mak ida ne’e atu la’o ba-oin,” dehan Deputadu António da Conçeição.

Entretantu, Deputada FRETILIN, Maria Angélica Rangel informa, millaun $250 ne’e preve situasaun previstu sira, loloos ne’e proposta lei rua ne’e urjénsia.

“Se ita la muda lei ita ko’alia buat sira-ne’e falsu hotu, tanba millaun $250 la sufisiente ba kestaun inundasaun no COVID-19,” nia dehan.

Deputada PLP, Maria Angelina Sarmento Lopes, pedidu levantamentu ho millaun $250 ne’e seidauk inklui asuntu kombate Coronavirus no inundasaun.

“Ne’e hatudu katak Timor-Leste prontu simu Coronavirus. Agora ho millaun $250 ne’e la sufisiente. Ha’u hanoin Governu la iha kondisaun, loloos ne’e fó kompeténsia jurídiku ba Governu hodi foti osan boot liu hodi responde ba inundasaun no COVID-19,”  hateten Deputada Maria Angelina.

Nia esplika, loloos ne’e pedidu levantamentu no alterasaun lei ne’e tenke la’o dala-ida tanba iha ligasaun maibé aprova de’it mak pedidu levantamentu entaun governu labele halo buat ida.

Deputadu KHUNTO, Luis Roberto hateten, pedidu levantamentu atu responde situasaun ne’ebé rai-laran.

“Ida-ne’e bankada KHUNTO prontu apoia 100%, KHUNTO sei a-favór no sei la kontra ba pedidu levantamentu,” dehan Deputadu Luis Roberto.

Deputada PD, Elvina Sousa, konsidera pedidu ne’e urjénsia no nesesáriu atu hetan aprovasaun hosi Parlamentu Nasionál.

“Ha’u sei apoia pedidu levantamentu estraordinária ne’e tanba ne’e nesesáriu atu fó resposta ba situasaun ne’ebé ita hasoru,” nia hateten.

Deputadu Partidu Demokrátiku (PD), Adriano do Nascimento, konsidera pedidu levantamentu no proposta alterasaun ne’e importante hotu.

“Ba ha’u rua ne’e importante tebes ba estadu ida-ne’e. Tanba estadu la iha Orsamentu Jerál Estadu. Kualkér inisitiva hosi Governu hodi responde estadu nia problema, ha’u ‘a-favór’. Ha’u-nia preokupasaun mak ne’e, sera que ida-ne’e to’o enkuantu moras hada’et iha Timor laran, Sera que ita sei mai atu debate tán. Ha’u hanesan reprezentante povu sei vota a-favór hodi Governu rezolve problema. Sera que governu la hatene akontese inundasaun no akontese COVID-19 tanba ne’e akontese antes ona, ida-ne’e ha’u-nia sujestaun,” dehan Deputadu Adriano do Nascimento.

Xefe Bankada Parlamentár UDT/FM, Francisco Xavier Carlos, importante liu mak pedidu levantamentu hodi responde situasaun hotu-hotu.

“Urjénsia ida agora ita ko’alia ne’e oinsá responde povu nia situasaun, tanba ne’e interese nasionál aas liu. Se pedidu levantamentu la to’o, ita mak halo lei bele halo fila-fali,” nia dehan.

Notísia Relevante: PN Hahu Debate Pedidu Urjénsia Proposta Governu Ba Levantamentu FP

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here