Reprezentate husi ONU no OMS iha Timor-Leste, hasoru Malu ho Primeiru-Ministru, Taur Matan Ruak, iha Sentru Konvensaun Dili, iha kuarta ne’e. Imajen/Mídia GPM

DILI, 25 marsu 2020 (TATOLI) – Primeiru-Ministru (PM), Taur Matan Ruak, husu deskulpa ba Organizasaun Mundiál Saúde (OMS) relasiona ho deklarasaun falta kuidadu hosi Komandante Operasaun Nasionál Polísia Nasionál Timor-Leste (PNTL).

Iha kuarta ne’e, PM Taur simu Koordenadór Rezidente Organizasaun Nasaun Unida (ONU) iha Timor-Leste, Roy Trivedy no Reprezentante OMS, Rajesh Pandav, ne’ebé hato’o lamentasaun ba Xefe Governu kona-ba deklarasaun husi Komandante Operasaun Nasionál PNTL, Superintendente Xefe Polísia, Pedro Belo, ne’ebé fó sai iha Rádiu Televizaun Timor-Leste (RTTL), edisaun tersa (24/3), katak OMS ninia prezensa iha Timor-Leste hanesan projetu ida.

Hafoin simu tiha lamentasaun, Xefe Governu aproveita hodi Governu Timor-Leste nia naran hato’o deskulpa ba OMS, hodi realsa katak deklarasaun refere la refleta Governu no Estadu Timor-Leste.

Tanba ne’e, PM Taur orienta ona Ministru Interiór interinu, Filomeno da Paixão de Jesus, hodi komunika ba Komandante ne’e, katak proibi hato’o deklarasaun fora husi ninia knaar ka área serbisu.

“Governu iha konfiansa nafatin ba OMS no apresia tebes ba serbisu organizasaun ne’e iha Timor-Leste, ne’ebé daudaun ne’e ajuda tebes Governu liuliu iha luta kontra pandemia COVID-19”, hateten PM Taur liuhosi nota ne’ebé Agéncia Tatoli asesu iha Gabinete Primeiru-Ministru (GPM), kuarta ne’e.

Biban ne’e, Reprezentante Rezidente ONU agradese tebes ba asaun Xefe Governu nia, nune’e labele interrompe serbisu hamutuk entre OMS no Timor-Leste ne’ebé durante ne’e iha ona.

Relasiona ho deklarasaun Komandante Operasaun Nasionál PNTL, Superentendente Xefe Pedro Belo ne’ebé Agência Tatoli sita liuhosi RTTL katak, Pedro Belo sente triste ho prezensa OMS ninian iha Timor-Leste, tanba la’ós atu hamutuk hodi buka prevene Coronavírus maibé buka kompleta dadus atu finaliza sira ninia projetu.

“Ami haree ba sira (OMS) esplikasaun ne’e halai liu ba projetu ida no sira mai atu buka dadus de’it, atu tama ba ema na’in hira suspetu ba Coronavírus ne’e hira, no na’in hira mak pozitivu tiha ona, ida-ne’e maka sira atu kompleta sira nia relatóriu no halo kompletu sira nia baze dadus de’it. Maibé inisiativa atu apoia ekipamentu ruma, apoia médiku husi nasaun seluk maka sira fó referensia ne’ebé maka mai husi nasaun Xina”, dehan Komandante Operasaun ne’e.

Ba kestaun ne’e, liuhosi nota ida, Koordenadór Rezidente ONU iha Timor-Leste, Roy Trivedy, hato’o lamentasaun no rejeita ba deklarasaun Komandante Operasaun ne’e.

“Deklarasaun ne’e fatualmente laloos tanba Primeiru Ministru, ofisiál superiór hosi Ministériu Saúde, membru Parlamentu no líder sira-seluk barak maka rekoñese tiha ona publikamente kontribuisaun boot hosi OMS hodi tulun Timor-Leste prepara-an ba pandemia COVID-19”, subliña Roy Trivedy liuhosi nota ida.

Tuir Koordenadór Rezidente ONU, deklarasaun ne’e hatudu komprensaun laloos kona-ba knaar OMS nian nu’udar ajénsia espesialista hosi ONU ne’ebé servisu iha Timor-Leste hodi fó konsellu, suporte no apoiu ba Governu kona-ba asuntu saúde hotu.

Entretantu, to’o notísia ne’e publika, Agência Tatoli seidauk konsege konfirma ho Komandante Operasaun Pedro Belo.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here