Imajen tatoli/António Goncalves

DILI, 25 marsu 2020 (TATOLI)—Parlamentu Nasionál (PN), ohin, deside destinu asuntu importante tolu relasaun ho orsamentu atu finánsia mákina estadu, proposta alterasaun no projetu rezolusaun prevensaun hasoru COVID-19 (Coronavirus).

Ajenda importante tolu ne’e mak hanesan pedidu ho karáter urjénsia ne’e kona-ba Proposta Lei númeru 12/V (2a)-alterasaun datoluk lei númeru 13/2009, de 21 de outubru kona-ba Orsamentu no Jestaun Finanseira.

Ajenda daruak, kona-ba diskusaun no votasaun ba pedidu urjénsia ba proposta lei númeru 13/V (2a)-autorizasaun ba realizasaun transferénsia estraordinária ba fundu petrolíferu

Ajenda datoluk, kona-ba diskusaun no votasaun ba projetu rezolusaun númeru 51/2020, kona-ba adosaun medida prevensaun no kombate COVID-19 (Coronavirus).

Ho ajenda tolu ne’e, Xefe Bankada Parlamentár CNRT, Duarte Nunes hateten, pedidu estraordinária atu halo levantamentu ba fundu petrolífetu importante liu proposta alterasaun Lei Orsamentu no Jestaun Finanseira.

“Ita tenke haree pedidu ida-ne’ebé mak importante liu iha momentu ne’e, tuir ami (CNRT) importante liu mak foti osan (pedidu levantamentu ba fundu petrolíferu), hodi atende situasaun ne’ebé ita hasoru ne’e, ida-ne’e mak só urjénsia, ne’e mak ami-nia pozisaun, ita sei haree aban,” dehan nia ba jornalista sira, iha resintu Parlamentu Nasionál, foin lalais ne’e.

Deputadu Partidu Libertasaun Populár (PLP), Francisco Vasconselos hateten, situasaun atuál oras ne’e opurtunu altera lei refere hodi fó resposta ba dezastre naturál no oras ne’e kazu COVID-19 (Coronavirus) deteta ona iha Timor-Leste.

“Laiha ema governu ida ho intensaun altera lei hodi hariku nia-an, ne’e la iha. Se dehan urjénsia ka lae, ami dehan urjénsia. Se Orsamentu Jerál Estadu liu karik entaun agora ita deskute iha ne’e ida,” nia dehan.

Deputadu FRETILIN, Francisco Branco hateten, alterasaun ne’e atu halo rezolve problema nasionál, tanba ne’e labele halimar ho kór polítika.

“Ita-nia estadu emerrjénsia nasionál tanba ne’e tenke debate urjénsia duni ba alterasaun ne’e. Ha’u hanoin haree kestaun ne’e ho konsiénsia estadu nian. Sé mak kria situasaun ne’e hodi la viabiliza Governu tanba ne’e alterasaun ne’e pertinente hodi fó solusaun bai ta-nia problema,” nia hateten.

Entretantu, Prezidente Koligasaun atuál Prezidente Partidu Congresso Nacional para a Reconstrução de Timor (CNRT), Kay Rala Xanana Gusmão, husu ba deputadu Aliansa Maioria Parlamentár (AMP) atu “vota kontra” ba proposta alterasaun Lei Orsamentu no Jestaun Finanseira.

Razaun la apoia ka a-favór ba proposta alterasaun ne’e tanba Xanana Gusmão konsidera Taur Matan Ruak hanesan Primeiru-Ministru demisionáriu.

Tuir nia, Primeiru-Ministru la iha kompeténsia atu aprezenta proposta ruma ba Parlamentu Nasionál atu altera lei estruturante.

“Primeiru-Ministru haruka fali proposta altera lei iha parlamentu, nia la iha kompeténsia. Ami la’ós minoria, ami maioria. Ho ida-ne’e mak ami tuur iha-ne’e (konferénsia imprensa) hodi dehan katak sei la iha deputadu ida mak fa’an-an (vota a-favór). Deputadu sira-ne’ebé tuur iha ne’e la iha ida hakruuk simu osan atu fó votu,” Xanana Gusmão informa liuhosi konferénsia imprensa, ne’ebé partisipa hosi Prezidente partidu Neen (6), iha sede CNRT, Bairro dos Grilhos, Dili, tersa ne’e.

Tuir observasaun Agência TATOLI, oras ne’e daudaun reuniaun líder bankada sira deskuti hela pedidu urjénsia ba proposta lei númeru 13/V (2a)-autorizasaun ba realizasaun transferénsia extraordinária ba fundu petrolíferu no projetu rezolusaun númeru 51/2020, kona-ba adosaun medida prevensaun no kombate coronavirus.

Hafoin termina reuniaun líder bankada sei lori ba plenária hodi halo diskusaun no votasaun ba ajenda importante tolu (3) ne’e. Rádiu no Televizaun Timor-Leste (RTTL) sei halo transmisaun direta ba diskusaun no votasaun ba asuntu tolu (3) ne’e.

Notísia Relevante: PN Adia Votasaun Ba Proposta Alterasaun Lei Orsamentu no Jestaun Finanseira

Jornalista : Evaristo Soares Martins

Editór     : Cancio Ximenes

HAKEREK NO HATÁN

Please enter your comment!
Please enter your name here