Imajen Tatoli/Osória Marques

DILI, 25 marsu 2020 (TATOLI)–Lia-Nain ne’ebé daudaun ne’e serbisu iha Sektretáriu Estadu Arte no Kultura (SEAK), Eugenio Sarmento informa, ohin, sei realiza serimónia rituál tuir kultura Timor-Leste nian hodi satan ba vírus COVID-19.

Informalmente, nia hatutan, Kay Rala Xanana Gusmão fó tiha ona orientasaun ba lisan barak iha munisípiu ida-idak halo tiha ona seriomónia rituál tuir ida-idak nia lisan. Iha parte Dili nian, tuir nia, Sekretáriu Estadu Arte no Kultura sei realiza serimónia ritual taka odamatan nian ba rituál sira ne’ebé munisípiu sira hala’o ona antes ne’e.

“Informalmente Maun Boot Xanana fó tiha ona orientasaun ba lisan barak iha munisípiu sira ida-idak halo tiha ona seriomónia rituál tuir ida-idak nia lisan. Iha parte Dili nian, orsida lorokraik tuku 15:00 OTL, Governu liuhosi Sekretáriu Estadu Arte no Kultura sei realiza serimónia rituál ikus ka taka ba rituál sira ne’ebé munisípiu sira seluk halo antes ne’e,” dehan Lia-Nain, Eugénio Sarmento, ba Ajénsia TATOLI liuhosi telefone, kuarta ne’e.

Lia-Nain ne’e hatutan, objetivu husi serimónia rituál ida ne’e relasiona ba vírus COVID-19 ne’ebé daudaun ne’e sai preokupasaun ba mundu tomak no inklui Timor-Leste mós sai afetadu hotu ba COVID-19 (Coronavirus).

Antes ne’e, nia dehan, Eis Prezidente Kay Rala Xanana Gusmão orienta ona lia-nain hosi munísipiu sira iha Timor laran tomak, ida-idak halo hotu ona rituál husu ba Aman Maromak no natureza Timor-Leste hamriik no satan netik vírus COVID-19. Entaun, ohin, parte Dili nian maka sei taka ba serimónia sira ne’e.

“Serimónia ida ohin ne’e hanesan taka ba serimónia sira halo ona antes ne’e. Tanba Dili hanesan odamatan-boot ba Timor-Leste entaun lia-nain sira hosi munisípiu sira halo ona, entaun sira tula hamutuk mai iha Dili ne’e, mak husi Dili hodi hanehan tuun ba tasi para taka tiha odamatan,” nia haktuir.

Nia dehan, serimónia ritual ne’e sei hala’o iha tasi-ibun Faról, iha Ai-Toos ne’ebé kuda harii iha rezidénsia Prezidente Parlamentu Nasionál, Faról, Dili, nia oin no sei partisipa hosi lia-nain sira hosi areadór Dili nian.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here