Otél Audian, Dili. Imajen/Cipriano Colo

DILI, 25 marsu 2020 (TATOLI) – Ministériu Saúde (MS) to’o agora seidauk halo kontratu ho na’in ba Otél Audian ne’ebé uza hanesan fatin ba kuarentena ba timoroan sira ne’ebé fila husi nasaun afetadu COVID-19.

“Ha’u seidauk halo kontratu ho Ministériu Saúde atu uza otél ne’e hanesan fatin kuarentena tanba ha’u husu kompleta dokumentu, maibé aban ka bain-rua ami bele asina ona kontratu. Halo kontratu mós ha’u sei haree lai, bainhira aseita mak ami halo”, tenik Na’in Otél Audian, Americo F. Simão ba Agência Tatoli, iha Aeroportu Comoro, kuarta ne’e.

Americo haktuir, foin lalais nia parte fó hatene ona ba Ministra Saúde ein ezersisiu, Élia Amaral no Diretóra Odete Viegas katak kada kuartu ida, kalan ida ho kustu $60 no ba hahan ne’e kada ema ida ho folin $20.

“Ha’u hateten  ba Diretóra Ministériu Saúde Odete Viegas ita nia-ema iha ne’e hamutuk 82, inklui labarik na’in-rua. Iha fatin kuarentena ne’e ema na’in-rua iha kuartu ida no ba loron ida ami fó ema ida han dala tolu dader, meudia no kalan, maibé as vezes balun dala haat tan no dalaruma ita-nia ema sira ne’e mós hakarak han hahán di’ak de’it. Ami sei konta hotu tanba dader han ne’e ema ida $20 ne’ebé han dala tolu ne’e $60 ona kada loron”, nia akresenta.

Tuir Responsável Otél ne’e, ba hahán ne’e prepara hela modo oin haat ho etu inklui ai-fuan balun, maibé parte MS hateten ne’e la’ós problema tanba Governu halo ida ne’e ho tarif internasionál no iha hela osan atu selu.

Aleinde ne’e, nia adianta bainhira halo kontratu sei konta hotu tanba tanba timoroan sira iha kuaretena ne’e otél mak fase hotu roupa, uza wifi inklui ho ekipa ba médiku.

“Ami nia kuartu kalan ida $60 no ema han dala tolu no fase roupa inklui estrika ami seidauk konta”, nia informa.

Américo dehan, nia parte aseita uza nia otél sai fatin kuarentena tanba MS ba esplika katak timor-oan sira ne’e seidauk afetadu COVID-19, maibé mai iha ne’e durante loron 14 atu halo observasaun.

“Ministra Saúde mai koa’lia ho ha’u. Ha’u hatete ba sira tanba fatin ne’e otél no bainhira akumula ema moras ne’e risku boot ida mai ha’u tanba orsida ha’u nia otél mós ema lakohi hela no viziñu sira mós hirus ha’u”, nia esplika.

Maibé, nia afirma Ministra Saúde esplika katak uza fatin ne’e hanesan kuarentena ida ba timor-oan sira atu hela sira durante loron 14 atubele kontrola loron-loron kuandu laiha sitoma ba COVID-19 maka sira bele fila ba uma.

“Ministra dehan mai ha’u, sira ne’ebé mai no hela iha ne’e mak  ita nia Duotór sira haree nia manas liu derajat sélsiu 37, maka bele lori ba fatin seluk. Ne’e maka ha’u aseita”, nia salienta.

Nune’e, Dirijente ne’e rekoñese iha traballadór hamutuk 14, maibé hela na’in-rua maka tama servisu no seluk ne’e lakohi hotu tanba ta’uk afetadu Coronavírus.

“Ha’u husu tan Ministériu Saúde, se sira ne’e mak iha moras ne’e maka kalan ida $10.000 mós ha’u lakohi tanba ne’e kona-ba ema-nia vida”, nia dehan tan

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here