Vise Ministru Saúde, Bonifácio Maucoli dos Reis, observa direitamente kondisaun kuarentena COVID-19 iha Postu Integradu Batugade. Imajen/Eugénio Pereira

BATUGADE, 25 marsu 2020 (TATOLI)- Ministériu Saúde ho ekipa tékniku no kompañia nasionál balun iha Munisípiu Bobonaro,  hahú instala kuartu provizóriu hamutuk 300 iha fatin kuarentena Postu Integradu Batugade, Postu Administrativu Balibo. 

Notísia Relevante : Ohin, Governu Orienta Lia-Na’in Sira Halo Rituál Atu Satan COVID-19

Vise Ministru Saúde ba Dezenvolvimentu Estratéjiku Saúde (VMDES), Bonifácio Maukoli dos Reis, observa direitamente kondisaun kuarentena COVID-19 iha Postu Integradu Batugade. Imajen/Eugénio Pereira

Fatin kuarentena ne’e uza provizóriu edifísiu no loja sira ne’ebé Ministériu Komérsiu Indústria  no Turizmu  harii  ona iha Merkadu Tradisionál Batugade nian.

Vise Ministru Saúde ba Dezenvolvimentu Estratéjiku Saúde (VMDES), Bonifácio Maukoli dos Reis dehan, postu kuarentena ne’e hahú tersa lokraik, kompañia nasionál hosi Munisípiu Bobonaro sei harii hotu depois ekipa Ministériu Saúde sei tau fasilidade médiku no rekursu pesoál saúde kompletu hodi fó asisténsia ba Timoroan ne’ebé tama mai hosi Indonézia  hodi halo akompañamentu ba sira-nia saúde.

Bonifácio dehan, daudaun ne’e iha Dili, governu aluga ona Otél Audian, Novo Horizonete Metiaut no Tibar hodi estabelese kuarentena ne’ebé okupa ona hosi Timoroan sira.

Fatin kuarentena Batugade ne’e rasik sei atende komunidade sira ne’ebé halo viajen liu postu Integradu Mota Masi Covalima, Nunura-Maliana no Batugade nian.

“Ha’u mai haree direita fatin ne’e própriu ona, ohin kalan ba oin kompañia nasionál sira bele harii ona kuartu provizóriu 300 para atu fasilita Timoroan sira ne’ebé mai liu Postu Batugade no Mota-Masi nian bele mai hela provizóriu,” dehan Bonifácio Maukoli ba jornalista.

Konsellu Ministru rasik aprova ona orsamentu hamutuk Milaun $5 hodi sosa ai-moruk fahe ba povu inklui atende no prevene pandemia Coronavirus ka  COVID-19 iha territóriu Timor-Leste.

“Konsellu Ministru aprova ona miliaun $5 hodi sosa ai-moruk no ekipamentu médiku no miliaun $2 ba Fundu Kontinjente hodi fó responde ba servisu operasaun subsídiu ba professional saúde, membru seguransa sira, alimentasaun no intensivu ba nesesidade sira-seluk  tan,” nia hateten.

Ba Timoroan sira durante hela iha kuarentena ne’e sei hetan asisténsia médiku inklui han no hemu kompletu.

Bonifácio lia tutan, médiku sira ne’ebé sei hala’o servisu iha fatin ne’e treinadu ona no sira-sei uza rekursu ne’ebé iha para fó asisténsia saúde durante oras 24 ba Timoroan sira.

Kona-ba bee moos, Vise Ministru Bonifácio dehan, ekipa sei halo instalasaun kompletu ho hariis fatin inklui fasilidade sira-seluk hanesan shampoo no sabaun.

Númeru Emerjénsia 199 COVID-19

Iha loron 24 marsu 2020, Konsellu Ministru liuhosi reuniaun estraordinária deside númeru emerjénsia 199, atu fasilita komunidade  bele kontaktu gratuitamente ba ekipa Saúde kombate COVID-19, karik sente sintoma Coronavirus. 

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here