Pasajeiru sira hadau malu bis iha Terminal Becora atu hala'o sira nia viajen ba munisípiu Baucau. Imajen/Nelson de Sousa

DILI, 25 marsu 2020 (TATOLI) – Hafoin Ministériu Saúde anúnsia deteta kazu pozitivu COVID-19 dahuluk iha Timor-Leste ba ema na’in-ida iha loron 21 marsu, movimentasaun komunidade ba husi Kapitál Dili ba munisípiu hahú sa’e maka’as.

Estudante Universidade Dili (UNDIL), António Martins, hateten razaun atu ba munisípiu tanba aproveita feriadu ne’ebé anunsia husi Ministériu Edukasaun, Juventude no Desportu (MEJD) no sente pániku ho COVID-19.

“Ami ba foho tanba tauk moras COVID-19, ne’ebé Ministériu Saúde (MS) dehan deteta ona ema na’in-ida maka pozitivu”, tenik estudante universitáriu husi Munisípiu Lautém ne’e ba Agência Tatoli, bainhira hein Bís iha Igreja Hati Kudus nia-oin, Becora, iha kuarta madrugada ne’e.

Estudante ne’e dehan, maski feriadu ne’ebé MEJD fó ne’e atu estudante sira tuur hakmatek iha uma hodi estuda no hadook-an husi afetadu COVID-19, maibé nia parte deside ba munisípiu atubele seguru liu husi  virus ne’e.

Ho nune’e, nia adianta bainhira Governu deside fali universidade no eskola sira hahú prosesu aprendizajen mak nia mai fali Dili.

Sorin seluk, komunidade Munisípiu Baucau, Felizarda Maria dehan nia parte deside desloka ba munisípiu ho ninia família sira, atu hadook-an husi COVID-19.

“Ami ba hotu munisípiu tanba ami tauk moras a’at ne’ebé hahú deteta iha ita-nia rai”, nia salienta.

Aleinde ne’e, kondutór Bís ida husi Munisípiu Lautém, ne’ebé lakohi publika ninia naran dehan kuaze kada loron tula pasajeiru nakonu.

“Ami kuaze loron ida Bá-Mai munisípiu hodi hatún pasajeiru no fila kedan tula fali pasajeiru sira. Ne’ebé ami agora kada bís iha kondutór rua, nune’e bainhira ida dukur ida kondús filafali”, nia akresenta.

Tuir observasaun Agência Tatoli, iha terminál Becora nota katak komunidade husi Munisípiu tolu hanesan Baucau, Viqueque no Lautém, antes ne’e  hela no eskola iha kapitál Dili nakonu iha terminál hodi hein transporte.

Jornalista:  Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here