Atividade iha Portu Dili. Imajen/Egas Cristovão

DILI, 25 marsu 2020 (TATOLI) – Maski Ministériu Saúde (MS) deklara hetan ona kazu pozitivu COVID-19 ba ema na’in ida, maibé movimentasaun importasaun no esportasaun iha Portu Dili la’o ho normál.

Prezidente Konsellu Administrasaun Autoridade Portuáriu Timor-Leste (APORTIL), Flávio Cardoso Neves, informa funsionamentu atividade portu  daudaum ne’e la’o normál no laiha problema, liuliu ba sasán nesesidade báziku  kontinua tama.

“Iha portu nian ne’e, atividade importasaun no esportasaun la’o normál. Ezemplu ida maka hanesan importasaun tuir desizaun Governu nian, oinsá maka atu garantia nesesidade báziku kontinua tama fatin ba rai-laran”, nia dehan ba Ajênsia Tatoli iha Portu Dili, kuarta ne’e.

Daudaun ne’e husi parte APORTIL halo ona koordenasaun ho parte Alfándega, nune’e identifika ona fatin bainhira sasán nesesidade báziku bainhira tama iha rai-laran maka iha fatin atu rai.

“Maibé preukupasaun ida maka laiha ekipamentu atu proteje  funsionáriu APORTIL baihira atu hatún sasán, tanba ne’e maka ha’u dehan kuandu laiha nesesidade ami-nian funsionáriu labele tun tanba ne’e risku”, Flávio akresenta

Nia adianta, nesesidade báziku ne’e tempu ida mos bele garantia tama nafatin maibé ho mekanizmu ne’ebé ho kontrolu másimu.

“Ho situasaun ida-ne’e, ita foku liu ba iha ba importasaun ba nesesidade bázikú no depende ba Rezolusaun Governu nian. Situasaun ida ne’e ita labele asegura nafatin sasán nesidade báziku bele tama ho mekanizmu ne’ebé maka rigorozu, tantu ita tenke proteje ita-nian ema sira sira bainhira hatún sasán karik oinsá”, Responsável APORTIL ne’e.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here