Majór Jenerál FALINTIL-Forsa Defeza Timor-Leste (F-FDTL), Lere Anan Timur, hala´o reuniaun ho Xefe Estadu Lú Olo hodi ko´alia kona-ba asuntu umanitária iha rai laran. Imajen/Mídia Palásiu PR.

DILI, 25 marsu 2020 (TATOLI)–Xefe Estadu Maiór Jenerál Lere Anan Timur husu ba Governu no polítiku sira atu tau prioridade ba asuntu umanitária ne’ebé akontese ona iha Timor-Leste hodi halo komunidade sira pániku liuliu ba pandemia COVID-19.

Tanba ne’e, nia hatutan, nu’udar militár, sira konsellu de’it ba polítiku sira maibé husu nafatin situasaun umanitária mak fó prioridade liu .

“Nu’udar militár, ami konsellu de’it ba polítiku sira maibé ha’u dehan situasaun umanitária mak prioridade. Nune’e, di’ak liu polítiku na’in sira tau situasaun polítika ne’e hanesan aspetu sekundáriu. Maibé fó atensaun no prioridade ba situasaun umanutária liuliu ba pandemia COVID-19 ne’ebé halo komunidade sira pániku,” dehan Maiór Jenerál Lere Anan Timur hafoin hasoru malu ho Prezidente Repúblika iha Palásiu Prezidensiál, Bairru Pité, Dili, kuarta ne’e.

Ezemplu, nia dehan, ohin loron jovén timoroan sira ne’ebé mak hela ema nia rain no sira hakarak atu fila fali mai iha Timor-Leste maibé oinsá kria kondisaun para bele simu sira mai fali sira rain.

“Sira tauk tanba moras COVID-19 hanesan iha Korea, Austrália no Indonézia ne’ebé halo ema barak sai vítima. Ba ita, di’ak no sorte mak to’o agora ita kazu foin mak pozitivu ida maibé la’ós timoroan. Nia ema estrajeiru no mós na’in lima seluk tuir rezultadu teste konfirmadu negativu,” nia hateten.

Lere hateten, ho rezultadu teste ne’ebé konfirmadu negativu halo ita brani fali maibé antes ne’e pániku no tauk tanba kompara ho nasaun seluk hanesan Italia mate barak no loron ida liu ema 500  mak mate.

“Ho nune’e, ha’u husu atu prevene keta mosu iha Timor karik. Tanba ho ida ne’e, ha’u repete tan, katak ita tenke fó prioridade ba umanitária,” nia hateten.

Nia dehan, agora Governu ne’ebé mak sei iha, Primeiru-Ministru Taur Matan Ruak mós sei iha tanba Prezidente Repúblika sei demite nune’e bele halo esforsu hotu-hotu ho nia membru hotu atu bele responde ba situasaun ida ne’e, liuliu COVID-19 (Coronavirus) ne’e,” nia dehan.

Entretantu, Majór Lere dehan situasaun krize dezastre naturál sobu uma, ohin ka aban, halo fali uma maibé ema mate la fila ona.

“Ha’u dehan, ohin, kadeira lakon maibé tinan oin hetan fali kadeira. Maibé, ita lakon ita-nia populasaun ne’ebé um millaun itál de’it,” nia dehan.

Notísia Relevante:  Lere Anan Timur: “Ami Ko’alia Asuntu Umanitária”

Jornalista : Osória Marques

Editór      : Cancio Ximenes

1 KOMENTÁRIU

  1. Concorda perfeitamente, iha buat barak mak importante maibe atende uluk lai ida nebe prioridade. Ita hein katak liderança sira tetu didiak e fo uluk prioridade ba ida nebe mak liga ho ema barak nia vida. Viva TL

HAKEREK NO HATÁN

Please enter your comment!
Please enter your name here