Komandante Jeral F-FDTL Maior Jeneral Lere Anan Timur, bainhira hasoru malu ho Presidenti da Republika Francisco Guterres. Imajen/Media PR

DILI, 25 marsu 2020 (TATOLI)–Xefe Estadu Maiór Jenerál F-FDTL, Majór Jenerál Lere Anan Timur informa, ohin, hala’o soru-mutu ho Prezidente Repúblika hodi ko’alia kona-ba situasaun rai-laran liuliu kona-ba polítika atuál no kestaun umanitária.

“Ohin, ami mai hasoru Prezidente Repúblika atu informa situasaun rai-laran no ami mai rona mós hanoin ruma hosi Prezidente Repúblika kona-ba ami-nia serbisu. Ohin, parte rua ko’alia kona-ba kestaun polítika no kestaun umanitária ne’ebé akontese iha rai-laran,” dehan Majór Jenerál Lere Anan Timur ba jornalista sira iha Palásiu Prezidente, Dili, ohin.

Tanba, nia dehan, kestaun umanitária agora mosu situasaun COVID-19 (Coronavirus) no dezastre naturál ne’ebé akontese no afeta ba komunidade sira ne’ebé barak mak lakon uma no lakon sasán, dalaruma ohin loron Ministériu Solidaridade Sosiál seidauk fó asistensia.

Nia informa, kestaun seluk ne’ebé sira ko’alia mak situasaun polítika ne’ebé hamosu impase polítika.

“Maibé, ha’u hanoin katak situasaun rua ne’e, hotu-hotu importante maibé mós iha nia prioridade. Agora, ita nu’udar timoroan ne’ebé mai hosi funu naruk ida. Ita-nia populasaun ho juventude rihun ba rihun mak mate ba ukun an ne’e. Ita lakohi katak ita-nia povu moris iha terus, susar no mate tan. Mate la’ós tan kilat musan maibé mate tan polítika. Maibé COVID-19 hanoin katak atrapalla kria pániku ba ita-nia komunidade,” nia haklaken.

Nia dehan, haree situasaun nasaun dezenvolvidu nian ne’ebé iha kondisaun hotu-hotu, agora ita sei mate maibé Timor foin ukun an no foin sub-dezenvolvidu, meiu hotu-hotu la iha.

“Se buat ne’e mak akontese, ha’u hanoin katak ita-nia situasaun ne’e atu la’o oinsá,” nia dehan.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here