Ministru Reforma Lejizlativa no Asuntu Parlamentár, Fidelis Manuel Leite Mangalhães. Imajen Tatoli/Egas Cristovão

DILI, 25 marsu 2020 (TATOLI) – Portavóz VIII Governu, Fidelis Manuel Leite Magalhães husu ba Komisaun interministeriál ne’ebé trata asuntu prevensaun pandemia COVID-19, atu fó sai informasaun klaru nune’e labele halo povu pániku.

Tuir atuál Ministru Reforma Lejizlativa no Asuntu Parlamentár ne’e katak, hanesan komisaun ninia knaar atu haree liu ba surtu ne’ebé maka akontese no afeta ona ba rai-laran, tanba Governu fó ona asume ona knaar tomak ba komisaun interministeriál ne’ebé kompostu hosi ministériu oioin no lidera hosi Ministériu Saúde (MS).

“Intermu komunikasaun kompetente, kabe ba papél instituisaun relevante ne’ebé maka tuur iha komisaun interministeriál, tanba ne’e tenke servisu no halo esforsu atubele iha komunikasaun ne’ebé di’ak liu tanba situasaun ne’e evolui”, dehan Ministru Fidelis  iha Sentru Konvensaun Dili (CCD, sigla portugés), kuarta ne’e.

Governante ne’e husu ba jornalista sira atu koopera di’ak ho komisaun interministeriál, nune’e komisaun bele hato’o informasaun ho loloos ba sidadaun sira.

“Se laiha informasaun loloos ne’e defísil atu manan luta kontra COVID-19 tanba agora eziji informasaun ka metódu partilla informasaun ne’ebé tenke bebeik, nune’e populasaun hatene saida maka la’o hela no sira akompaña ho kle’an no kalma”, nia subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here