Imajen Espesiál.

DILI, 25 marsu 2020 (TATOLI)—Bankada Parlamentár Frente Revolusionária Timor-Leste Independente (FRETILIN) no Bankada Partidu Libertasaun Populár (PLP) hala’o deklarasaun konjunta ida no husu ba koligasaun foun ne’ebé forma Aliansa Maioria Parlamentár (AMP) tenke tulun Xefe Estadu no hamutuk ho VIII Governu Konstitiusionál atu asegura povu Timor-Leste hosi ameasa pandemia COVID-19.

Vise-Xefe Bankada PLP, Francisco Vasconselos afirma, koligasaun foun labele obriga Xefe Estadu atu demite lalais tiha VIII Governu Konstitusionál, tanba Xefe Estadu halo hela esforsu hamutuk ho VIII Governu Konstitusionál hodi buka dalan ne’ebé mak adekuadu liuliu ba asegura povu no rai Timor-Leste hosi ameasa COVID-19.

“Koligasaun foun labele prefere liu asalta podér. Di’ak liu koligasaun foun hamutuk ho Governu buka solusaun ba problema surtu COVID-19 duké sira fila kotuk ba pedidu Governu atu altera Lei sobre Orsamentu no Jestaun Finanseira ho argumentu katak ida ne’e la urjente no hanesan fó ‘Cheque em Branco’ ba Governu. Enkuantu uluk sira mak halo alterasaun ho urjente ba Lei Atividades Petrolífera no Lei Fundu Petroliferu atu fo Cheque em Branco ba kompaña Timor Gap hodi asesu ba Fundu Petrolíferu livremente,” dehan Vise-Xefe Bankada PLP, Francisco Vasconselos, reprezenta bankada FRETILIN no PLP hato’o deklarasaun konjunta ne’e liuhosi konferénsia imprensa iha sala Bankada FRETILIN, kuarta ne’e.

Bankada FRETILIN no PLP husu atu povu tomak matan moris neon nain, atu labele husik aliansa foun ida ne’e aproveita fali situasaun iha ne’ebé nasaun hasoru hela ameasa boot husi COVID-19 (Coronavirus).

“Ami apela ba povu Timor-Leste tomak atu labele husik koligasaun foun halo presaun ba orgaun soberanu seluk ho intensaun de’it atu hadau ukun. Bankada FRETILIN no Bankada PLP konvoka konferénsia imprensa ida-ne’e atu denunsia tentativa atake ba podér ne’ebé hala’o hela hosi aliansa foun ne’ebé hanaran-an Aliansa Maioria Parlamentár foun,” nia dehan.

Deklarasaun konjunta ne’e, partisipa hosi Xefe Bankada FRETILIN, Aniceto Guterres, Vise-Xefe Bankada FRETILIN, Francisco Miranda Branco, Xefe Bankada PLP, Cornélio Gama “L7” no Vise-Xefe Bankada PLP, Francisco Vasconselos.

Notísia Relevante: Koligasaun Foun Husu PR Aseita Pedidu Demisaun PM

Jornalista : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here