DILI, 25 marsu 2020 (TATOLI) – Konsellu Ministru (KM), aprova Projetu Deliberasaun Governu, ne’ebé aprezenta hosi Ministru Koordenador Asuntu Ekonómiku interinu, Fidelis Manuel Leite Magalhães kona-ba polítika redusaun impaktu ekonómiku negativu no ba rekuperasaun ekonómika konsekuénsia ba pandemia COVID-19.
Maski diploma ne’e aprovadu, maibé Governu labele implementa tanba liga ho Proposta Alterasaun Lei Orsamentu no Jestaun Finanseira, ne’ebé daudaun ne’e ninia pedidu debate ho karatér urjénsia la pasa iha plenária kuarta ne’e.
Pedidu ne’e hetan rejeisaun husi Parlamentu Nasionál (PN) ho rezultadu a-favór 31, kontra 33 no abstensaun 0.
Nune’e, lejizlasaun ne’e baixa ba Komisaun C, ne’ebé trata asuntu Finansa Públika no debate tuir mai sei realiza ho karatér normál.
“Dokumentu ne’ebé aprova prevee konjuntu husi medida sira ne’ebé mak sei implementa husi Governu iha tempu útil, ho forma atu antesipa ba situasaun ne’ebé presiza hetan intervensaun bainhira akontese surtu husi COVID-19 iha nasaun Timor-Leste”, informa Ministru Fidelis Manuel Leite Magalhães hafoin ramata reuniaun ezekutivu iha Sentru Konvensaun Dili (CCD, sigla portugés), kuarta ne’e.
Notísia relevante: Proposta Alterasaun Lei Orsamentu no Jestaun Finanseira La Pasa iha PN
Diploma ne’e introdús medida sira ne’ebé garantia kontinuidade distribuisaun no fornesimentu ba sasán esensiál sira maka hanesan produtu hahán, ai-moruk – no ekipamentu klínika sira hodi bele garantia no fó kontinuidade ba prestasaun servisu komunikasaun eletrónika sira no mós ba asesibilidade ne’ebé sei jeneralizada husi sidadaun sira hotu.
“Ba sidadaun no empreza sira hotu sei hetan dispensa temporária husi pagamentu ba impostu sira no tarifa ba eletrisidade no bee-moos, kriasaun liña kréditu ba taxa ninia jurus sei redús no hanesan apoia finanseiru iha situasaun pandemia COVID19”, subliña Ministru Fidelis.
Atuál Ministru Reforma Lejizlativa no Asuntu Parlamentár ne’eadianta, membru Governu sira hotu mós hetan mandatu iha ámbitu atribuisaun husi kada ministériu sira hotu, hodi bele realiza inisiativa no prosedimentu sira hotu ne’ebé nesesáriu, no konveniente ba ninia implementasaun husi medida ne’ebé aprezenta, mak hanesan preparasaun ne’ebé nesesáriu ba aktu normativu sira hotu no negosiasaun husi akordu nesesáriu sira ho operadór sira hotu husi servisu no preparasaun prosedimentu ba aprovisionamentu.
Jornalista: Antónia Gusmão
Editora: Julia Chatarina
