Diretór Institutu Defeza Nasionál (IDN), Donaciano Costa Gomes "Pedro Klamar Fuik". Imajen/Egas Cristóvão

DILI, 25 marsu 2020 (TATOLI)-Diretór Institutu Defeza Nasionál Timor-Leste (IDN-TL), Donaciano Costa Gomes “Pedro Klamar Fuik” deklara, bazeia ba analiza no observasaun jerál ne’ebé ekipa IDN-TL hala’o nota katak, populasaun Timor-Leste daudaun ne’e seidauk preparadu atu izola-aan iha uma (stay home) hodi prevene pandemia Coronavirus ka COVID-19 ne’ebé hahú rejista suspeitu ida pozitivu.

Notísia Relevante : Governu Lansa Konstrusaun Laboratóriu ba Teste COVID-19

Diretór IDN-TL ne’e dehan, atu antesipa no hasa’e konsiénsia populasaun  hotu, ne’ebé oras ne’e hasoru realidade psikolojia seidauk preparadu, Ministériu Saúde tenke hala’o ona diseminasaun ativu ba informasaun sobre pandemia ne’e.

“Psikolojia populasaun Timor seidauk preparadu ho mosu pandemia COVID-19, no afeta liu ba populasaun hodi ba tama iha situasaun pániku derrepente,” hateten Pedro Klamar Fuik, liuhosi komunikadu imprensa ne’ebé Ajénsia Tatoli simu, ohin.

Nia husu Ministériu Saúde disemina  sobre efeitu hosi COVID-19, atu populasaun-sira hotu bele sente katak COVID-19 ne’e perigu ba ema nia vida.

Pedro Klamar Fuik husu ba Komisaun COVID-19 ne’ebé lidera hosi Ministériu Saúde presiza uza tempu  másimu ne’e hala’o ona diseminasaun no esplika sientifikamente ba populasaun kona-ba moras ne’e haree husi nia istória, nia efeitu,  no oinsá haree moras ne’e bele evolui no bele halo prevensaun.

Pedro Klamar Fuik  preokupa haree ba kondisaun ne’ebé governu prepara sei mukit tebes, halo ema ida-idak laran taridu,  tanba laiha auto konfiansa,  nune’e prefere governu tenke kria estudu defensiva .

“Esperiénsia realidade iha  Europa tanba saída maka  Coronavirus mosu hodi hamate sira-nia  ema barak, tanba sira la dun tau  preokupasaun, no tau konfiansa hela sira-nia medida avansadu,  kontrola situasaun ne’e iha kualkér tempu, maibé realidade lae no akontese, hamate ema barak,” Pedro Klamar Fuik tenik.

Diretór IDN-TL  husu ba povu Timor-Leste atu ativa akompaña informasaun kompletu hosi média sira para bele  koopera izola-aan iha uma para evita virus ne’e labele hada’et ba família idaidak hodi hetan prosesaun saúde di’ak.

“Hanesan Timoroan  ita nafatin iha fiar ho esperansa ba Maromak, kbiit natureza hosi rai-lulik no foho-lulik sira sei absolve tiha COVID-19 hosi Timor – Leste,” tenik nia.

IDN-TL mós prontu koopera ho autoridade lokál hodi sosializa impaktu hosi moras ne’e hodi povu bele kalma hasoru situasaun ne’e bele rekupera iha Timor-Leste inklui mundu tomak.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here