Laboratóriu " 333 Clinic" . Imajen: Nelia Fernandes

DILI, 25 marsu 2020 (TATOLI)-Governu liuhosi Ministériu Saúde kuarta (25/03/2020) lansa ona projeitu konstrusaun sala laboratóriu patolojia no mikrobolojia iha Ospitál Nasionál Guido Valadares (HNGV-sigla portugés), hodi halo teste ba kazu Coronavirus ka COVID-19.

Vise-Ministra ba Kuidadu Saúde Primáriu, Élia António de Araújo dos Reis Amaral. Imajen/Antonio Goncalves

Obra ne’e lansa diretamente hosi Vise Ministra Kuidadu Saúde Primária, Élia dos Reis Amaral ho parseiru sira no obra ne’e gastu orsamentu rihun $ 350.

Diretóra Laboratóriu Nasionál, Endang Soares, hateten laboratóriu ne’e sei fasilita HNGV atu halo teste ba COVID-19, tanba durante ne’e Ministériu Saúde tenke haruka amostra hosi suspeitu Coronavirus ba teste iha ospitál Darwin Austrália.

“Ohin ita lansa ba konstrusaun laboratóriu patolojia no mikrobolojia ne’e karik kazu COVID- 19 iha ita teste rasik ona,”katak Diretóra ne’e ba Jornalista sira iha HNGV, kuarta (25/03/2020).

Laboratóriu foun ne’e sei reforsa servisu laboratóriu Nasionál hodi halo teste ba suspeitu COVID-19 bainhira kazu kontinua aumenta maka’as iha Timor-Leste.

Projeitu ne’e implementa hosi Kompaña RMS ho Menzies ho durasaun fulan tolu hahú marsu to’o junu 2020.

Orsamentu ba obra ne’e, Ministériu Saúde hetan apoiu hosi Menzies Scholl of Research Darwin, Governu UK no Governu Austrália.

Menzies Scholl of Research Darwin mós sei apoiu fó formasaun rekursu umanu ba pesoál laboratóriu liliu iha área mikrobiolojia no seluk tan.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here