Lia-Na'in Karketu Motain Dili, Hamulak ba Maromak no Lulik Proteje Timor-Leste hosi COVID-19. Imajen/Manuel Pinto.

DILI, 25 marsu 2020 (TATOLI)-Governu liuhosi Sekretáriu Estadu Arte no Kultura (SEAK), iha kuarta (25/03/2020) organiza Lia-Na’in hosi Karketu Motain Dili hodi hamulak ba Maromak, matebian, rai-lulik no foho lulik sira atu proteje povu Timor-Leste hosi pandemia mundiál Coronavirus ne’ebé dadaun ne’e infiltra Mundu tomak inklui Timor-Leste.

Serimonia Rituál, oho animal hanesan fahi no manu ne’e hala’o iha Faról Dili, iha ne’ebé partisipa hosi Sekretáriu Estadu, Teofilho Caldas, Vise Ministru Administrasaun Estatál, Abílio José Caetano no konvidadus seluk tan.

Durante serimonia ne’e lao, Sekretáriu Estadu, Teofilho Caldas, informa ritual kulturál ne’e atu fó matak malirin no proteje povu iha nasaun ne’e hosi COVID-19 ne’ebé dadaun ne’e hamate ona ema barak iha mundu.

“Ha’u husu ba ita bo’ot sira atu hamulak ho didi’ak ba Maromak, rai-lulik, uma-lulik foho tasi fatuk no ai-lulik sira atu moras CORONAVIRUS ne’e labele tama iha ita nia rain,”dehan, Teofilho ba Lia-Na’in Sira, ohin.

Notísia Relevante :Ohin, Governu Orienta Lia-Na’in Sira Halo Rituál Atu Satan COVID-19

Iha biban hanesan, Vise Ministru Administrasaun Estatál (MAE), Abílio José Caetano, konfia katak ho rituál ne’e sei proteje duni povu hosi peste aat ne’e.

“Ohin halo fila fali serimonia rituál iha Dili no mós iha Munisípiu hotu, tanba virus a’at ida ne’e, ita husu matak malirin ba Maromak, Matebian rai no foho fatuk bee no buat sira ne’ebé ita fiar hamutuk ho lulik sira hotu sei satan moras at ida ne’e sei la mai to’o iha ita-nia ra’in,”reforsa Governante.

Lia-Na’in Karketu Motain, Maubere Villaverde, durante prosesu rituál ne’e la’o hamulak ba Maromak, lulik no matebian sira no fiar katak Timor-Leste sei livre hosi COVID-19.

“Moras ne’e sei la hada’et mai to’o ita iha rai lulik ida ne’e, rai ulun to’o rai ikun sei satan babeur ne’e sei la-tama iha ra’in ida ne’e. manu urat no fahi urat hatudu ona dalan, moruk ne’e sei buras tanba metan ne’ebé ita hameno sei satan mutin husi li’ur nian,” katak Maubere.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here