Otél Novo Horizonte, Metiaut, Dili. Imajen Tatoli/Felicidade Ximenes.

DILI, 25 marsu 2020 (TATOLI)-Ekipa médiku-sira kontinua hala’o observasaun  no vijilánsia ba ema na’in 102 ne’ebé daudaun ne’e hala’o  hela kuarentena Otél Novo Horizonte, Metiaút, Dili.

Notísia Relevante : Timoroan 34 Hosi Austrália Hela iha INAP

Médiku jerál, Estanislao Amaral. Imajen/Tatoli

Ema hirak-ne’e submete ba kuarentena bainhira sira hala’o vizita mai Timor-Leste hosi estranjeiru, hahú hosi domingu (22/03/2020) to’o tersa (24/03/2020).

Iha loron-rua liu-ba, Ministériu Saúde mós estabelese ona postu saúde ida iha fatin kuarentena Otél Novo Horizonte  hodi koloka médiku jerál na’in ida no enfermeiru na’in rua atu  monitoriza no vijilánsia liu-tan ba timoroan na’in 95 ho estranjeiru na’in hitu (7) durante oras 24 nia laran.

Estranjeiru na’in hitu ne’e, nu’udar sidadaun Indonézia, Zimbábue, Australia no Srilanka.

Médiku jerál ne’ebé destakadu iha postu saúde Otél Novo Orizonte, Estanislao Amaral hateten, sira-nia parte kontinua halo vijilánsia ba pesoál sira ne’ebé iha kuarentena rutina.

Nia dehan, atendimentu ne’ebé iha rejista ema balun ho moras baibain hanesan tensaun, estómagu no seluk tan hodi konsulta.

“Ita fokus liu-ba karik iha suspeitu ho sinál COVID-19 hodi asegura, maibé too momentu ida ita seidauk identifika,” hateten Médiku Estanislao Amaral hodi responde Ajénsia Tatoli, ohin, iha fatin kuarentena Otél Novo Horizonte, Dili.

Nia dehan, liuhosi konsulta,  iha kuarta (25/03/2020),  identifika pasiente balun ho moras infesaun respiratóriu, inus metin baibain, la’ós sintoma COVID-19.

“Ema sira iha ne’e nia  kondisaun saúde normal no la iha sintoma COVID-19,” hateten Estanislao Amaral.

Médiku Estanislao Amaral mós preokupa ho ekipamentu hanesan alkóliku, hand sanitizer ho luvas, ne’ebé dalaruma hotu lalais tanba estoke limitadu.

“Presiza uza kamera scanner tanba daudaun ne’e thermometer baibain  fó risku loos hodi asegura no kontrola efetiva ba ema sira-iha kuarentena laran,” Estanislao hateten.

Tuir observasaun Ajénsia Tatoli nian iha lokraik ne’e nota katak ema hirak ne’ebé daudaun iha kuarentena Otél Novo Orizonte kontinua hela ne’ebá, hodi hein to’o loron 14.

Jornalista : Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here