Sesaun Plenária., iha Parlamentu Nasionál. Imajen Tatoli/Egas Cristovão.

DILI, 24 marsu 2020 (TATOLI)—Deputadu sira ejize loke investigasaun ba kazu ahi-mate derrepente iha Parlamentu Nasionál tanba deskonfia sabotajen hasoru órgaun soberanu.

Kazu ahi-mate derrepente ne’e akontese iha segunda (23/3/2020) hahú hosi tuku 18:20 to’o 18:38. Kazu ne’e akontese bainhira diskusaun plenária la’o hela no besik atu tama ba aprovasaun  pedidu ho karáter urjénsia kona-ba alterasaun ba Lei Orsamentu no Jestaun Finanseira.

Xefe Bankada Parlamentár CNRT, Duarte Nunes haktuir, iha akontesimentu iha loron segunda liubá ahi-mate derrepente halo mídia nasionál sira no mídia sosiál mós akuza dehan CNRT mak halo.

“Ohin mós ema akuza tán iha ha’u-nia matan-laran, CNRT mak halo hodi boikote eletrisidade. Ne’ebé favór ida atu ita hakotu situasaun hanesan ne’e favór ida haruka ekipa ida ho despaisu hodi investiga to’ok sé mak halo ida-ne’e. Sé ita-nia ema mak halo ema ne’e la merese iha ne’e ona, ha’u husu hatún despaisu ida ba Sekretária Jerál investiga tanbasá mak ahi-mate,” Duarte Nunes prefere liuhosi plenária, Parlamentu Nasionál, kuarta ne’e.

Duarte Nunes husu rezultadu investigasaun tenke fó-sai liuhosi plenária Parlamentu Nasionál tanba gosta duun ba malu no gosta akuza ema.

Entretantu Xefe Bankada Parlamentár FRETILIN, Aniceto Guterres, husu investigasaun ba kazu ne’e.

“Sé akontese ida-ne’e, nia atu CNRT ka FRETILIN, nia halo krime no tenke prosesa,” hateten Xefe Bankada FRETILIN.

Deputadu Bankada Parlamentár PLP, Francisco Vasconselos hateten, hafoin ahi-mate nia parte buka kedas lojístika sira ahi-mate tanba saida, sira dehan ne’e kazu dahuluk ahi-mate tanba plenária mesak mak ahi-mate.

“Ligasaun sira seluk ne’e ahi-lakan hela. Ne’e ha’u mós dehan katak sabotajen,” dehan Deputadu Francisco Vasconselos.

Hatán ba kestaun ne’e, Prezidente Parlamentu Nasionál, Arão Noé de Jesus da Costa Amaral, esplika Sekretária Jerál PN, Cedelizia Faria dos Santos, klarifika liuhosi reuniaun líder bankada katak eletrisidade iha parlamentu la’ós independente maibé hamutuk ho Governu nian, kada fulan Governu mak selu la’ós parlamentu mak seluk.

“Tanba ita sentraliza iha ne’ebá, sé mate Governu mak hamate. Mezmu nune’e, ha’u sei toma nota hodi halo despaisu para halo investigasaun ba asuntu ne’e. Ha’u mós iha parlamentu kleur ona, ahi-mate primeira vez tanba atu vota mak mak ahi-mate. Se dehan ha’u mak orienta, ha’u prontu responsabliza,” dehan Prezidente Parlamentu Nasionál.

Notísia Relevante: Ahi Mate Derrepente, PN Adia Debate no Votasaun Alterasaun LOJF

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here