Arsebispu Metropolitana Arkidioseze Dili, Mgr. Virgílio do Carmo da Silva, SDB. Imajen/Dok. Dioseze Díli

DILI, 25 marsu 2020 (TATOLI)–Conferénsia Episcopál Timorense (CET), deside no ofisialmente anunsia katak, tinan ne’e la iha misa paskál hamutuk maibé husu sarani sira atu akompaña misa iha uma liuhusi Rádiu no Televizaun. 

“Sarani sira tuir selebrasaun iha sira-nia uma, bainhira misa sira  akompaña liuhosi rádiu no televizaun. Biar la simu komuñaun eukaristika maibé halo komuñaun espirituál (sei fornese fórmula ida ba sarani sira atu hala’o komuñaun espiritual),” Arsebispu Metropolitana Dili no Pro-Prezidente CET, Dom Virgílio do Carmo da Silva, SDB , lee sai desizaun ne’e liuhosi konferénsia imprensa, iha Sekretariadu Conferénsia Episcopal Timorense, Rua 12 Novembru, Balide, Dili, Timor-Leste.

Tanba ne’e, Dom Virgilio fornese fórmula ida ba sarani sira atu hala’o komuñaun spiritual hodi konvida sarani sira atu reza “Orasaun Komuñaun Espirituál” ida ne’e hodi bele hala’o Komuñaun espirituál, ne’ebé hetan aprovasaun hosi Conferénsia Episcopál Timorense (CET).

ORASAUN KOMUÑAUN ESPIRITUÁL 

Ha’u-nia Jesus…

Ha’u fiar Ita-Boot horik duni iha Sakramentu Eukaristia

Ha’u hadomi Ita-Boot liu sasán hotu

Ha’u hakarak tebes Ita-Boot hiit-an mai ha’u laran

Tanba agora ha’u labele simu Ita-Boot iha Sakramentu

Eukaristia

Hiit-an mai bá…

Espiritualmente iha ha’u fuan

Hanesan Ita horik duni ona iha ha’u laran

Halo sai ida de’it ho Ita no Ita keta hadook-an husi ha’u

Amen…!

Orasuaun Komuñaun Espirituál ne’e aprova no asina hosi Bispu Baucau no Sekretáriu Jerál CET, Dom Basílio do Nascimento, Arsebispu Dili no Pro-Prezidente CET, Dom Virgílio do Carmo da Silva, SDB, Bispu Maliana no Prezidente CET, Dom Norberto do Amaral no hahú vigora iha Tersa loron 24 fulan marsu 2020.

Notísia Relevante:  CET Deside Sarani Sira Akompaña Misa Paskál Liuhosi Rádiu no Televizaun

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here