Atividade iha Portu Dili. Imajen/Egas Cristovão

DILI, 25 marsu 2020 (TATOLI) – Hafoin Ministériu Saúde (MS) fó sai informasaun katak Timor-Leste konfirmadu kazu dahuluk COVID-19 ba ema na’in-ida pozitivu, maka Governu inklui entidade husi parte oin-oin hahú halo medida prevensaun, liuliu iha parte odomatan ne’ebé sempre liga ho ema husi rai-li’ur tama no sai hanesan Aeroportu, Fronteira sira no Portu.

Maski nune’e, tuir Prezidente Konsellu Administrasaun Autoridade Portuáriu Timor-Leste (APORTIL), Flávio Cardoso Neves, informa, to’o oras ne’e MS seidauk fasilita fasilidade ba funsionáriu APORTIL atu proteje-an.

“Ba fasilidade atu proteje-an, to’o oras ne’e Ministériu Saúde seidauk apoiu fasilidade ruma ba ami-nian funsionáriu sira hodi asegura durante hala’o servisu”, dehan Prezidente APORTIL ba Agência Tatoli, iha ninia knaar fatin, Portu Dili, kuarta ne’e.

Nia adianta, agora daudaun parte Alfándega maka iha ona fasilidade no hetan ona apoiu husi MS, maibé ba APORTIL seidauk.

“Agora funsionáriu sira ida-idak tenta aranja atubele proteje ba sira ninia-an hanesan luvas no máskara. Ha’u kontrola de’it maibé importante liu maka ha’u tenke haree ba ha’u nia funsionáriu sira kuandu situasaun la nesesáriu labele tama servisu”, nia subliña.

Tanba ne’e, nia husu ba iha funsionáriu sira atu ativu nafatin ho telemóvel, nune’e iha buat ruma bainhira halo servisu ruma importante, bele kontrola liuhosi telefone.

“Ha’u husu ba sira atu ativu nafatin sira nian telefone, nun’e kuandu halo servisu ruma importante bele liuhosi telefone, maibé kuandu la iha nesesidade ha’u dehan ba funsionáriu sira labele tama. Ita tenke hanoin sira tanba dalaruma sira nia servisu iha risku. Tanba ne’e bainhira laiha fasilidade atu asegura sira maka hetan sintoma vírus ne’e oinsá tanba ne’e risku”, Flavio dehan tan.

Tanba ne’e, maka nia parte hanoin hela atu rekomenda ba MS atubele oferese fasilidade hodi proteje-an, tanba vírus ne’e rasik la’ós halimar.

“Sa tán APORTIL nian haree maka hamutuk ho parte Alfándega atu halo kontrolu ba sasán ne’ebé tama no sai”, nia akresenta.

Tuir Flávio, daudaun ne’e funsionamentu servisu APORTIL nian la’o normál, liuliu ba kontrolu sasán tama no sai, nune’e mós atendimentu husi funsionáriu APORTIL la’o normál.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here