Prezidente Partido CNRT no Prezidente AMP, Kay Rala Xanana Gusmão, Gusmão. Imajen/Egas Cristóvão

DILI, 24 marsu 2020 (TATOLI)—Prezidente Koligasaun Foun no Atuál Prezidente Partidu Congresso Nacional para a Reconstrução de Timor (CNRT), Kay Rala Xanana Gusmão, husu ba deputadu Aliansa Maioria Parlamentár (AMP) atu la “a-favór” (vota kontra) ba proposta alterasaun Lei Orsamentu no Jestaun Finanseira.

Razaun la apoia ka la “a-favor” ba proposta alterasaun ne’e tanba Xanana Gusmão konsidera Xefe Governu Taur Matan Ruak hanesan Primeiru-Ministru (hato’o ona demisaun) laiha kompeténsia atu aprezenta proposta ruma ba Parlamentu Nasionál atu altera lei estruturante.

“Primeiru-Ministru haruka fali proposta altera lei iha Parlamentu, nia laiha kompeténsia. Ami la’ós minoria, ami maioria. Ho ida-ne’e mak ami tuur iha-ne’e (konferénsia imprensa) hodi dehan katak sei la iha deputadu ida mak fa’an-an (vota a-favór). Deputadu sira-ne’ebé tuur iha ne’e laiha ida hakruuk simu osan atu fó votu,” Xanana Gusmão informa liuhosi konferénsia imprensa ne’ebé partisipa hosi Prezidente partidu Neen (6) iha Sede CNRT, Bairros dos Grilhos, Dili, tersa ne’e.

Prezidente Partidu CNRT ne’e konsidera plataforma entendimentu ne’ebé hala’o hosi FRETILIN no PLP mak halo espekulasaun hodi habosok povu.

Xanana Gusmão kondena deklarasaun Sekretáriu Jerál Partidu FRETILIN ne’ebé dehan sei konvense Deputadu hosi Koligasaun AMP nian atu fó apoiu ba iha tentativa Partidu FRETILIN no PLP hodi forma Governu minória, ne’e hanesan tentativa atu hafahe Koligasaun no mós hamate deputadu koigasaun nia kareira polítika iha nia partidu rasik.

Tanba ne’e, koligasaun sei hamutuk foti asaun ba deputadu ne’ebé viola prinsípiu koligasaun tuir Lei Eleitorál.

Prezidente CNRT ne’e esplika Lei Eleitorál ba Parlamentu Nasional artigu 16 perda do mandatu ne’ebé hateten: “o deputado ao Parlamento Nacional, eleito em lista apresentada por partido ou Coligaçao partidaria perde o respetivo mandate nos seguintes casos e Viola a disciplina da Bancada Parlamentar em que se encontra integrado nos termos dos estatutos do partido politico a que pertence.

“Deputadu ne’e sei lakon nia estatatu bainhira viola disiplina bankada parlamentár ne’ebé nia pretense ba,” Xanana fó hanoin ba deputadu AMP sira.

Governu husu pedidu ho karáter urjénsia ne’e kona-ba Proposta Lei némeru 12/V (2a)-alterasaun datoluk lei númeru 13/2009, de 21 de outubru kona-ba Orsamentu no Jestaun Finanseira.

Tuir loloos destinu ba proposta alterasaun ne’e deside ona iha loron segunda (23/3/2020) maibé tanba ahi-mate derrepente entaun adia ba loron kuarta (25/3/2020).

Notísia Relevante: Koligasaun Foun Husu PR Aseita Pedidu Demisaun PM

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here