Unidade Polísia Fronteira (UPF). Imajen/PNTL

BATUGADE, 24 marsu 2020 (TATOLI)-Unidade Polísia Fronteira (UPF) halo apreensaun ba Timoroan na’in 20 ne’ebé halo viajen ilegálmente hosi fronteira Atambua-Indonézia mai fronteira terrestre Timor-Leste.

UPF halo apreensaun Timoroan hirak-ne’e iha  Balibo, Nunura, Covalima no Oe-Cusse nian.

Hafoin submete ba investigasaun, autoridade  UPF entrega kedas Timoroan sira-ne’e ba Ekipa Médiku Jerál COVID-19 hodi halo teste ba sira-nia saúde no transporte ona ba Dili hodi submete  ba kuarentena to’o loron 14.

“Hahú governu hasai rezolusaun too ohin loron, UPF halo ona apreensaun ba  ema na’in 20 ne’ebé liu ilegál mai fronteira hodi dezvia submete ba prosesu kuarentena,” informa Komandante UPF, Superintendente João Belo dos Reis, ba Ajénsia Tatoli, ohin, iha Postu Integradu Batugede, Bobonaro.

“Ohin dadeer, UPF nia kompañia Alva halo apreensaun mós  ba ita nia estudante Timoroan na’in rua tama mai liu dalan ilegál. Ami lori ba submete ona iha ekipa COVID-19 hodi haree sira-nia saúde depois haruka kedas ba kuarentena iha Dili,” dehan João Belo.

Estudante sira-ne’e tama ilegál, tanba daudaun ne’e fronteira integradu Timor-Leste ho Indonézia iha Motain aplika ona sistema loke oras rua, hahú tuku 10:00 too  de’it tuku12:00 Otl.

Iha parte seluk, iha Postu Suai nian halo apreensaun  mós  ba sidadaun Indonézia nian na’in haat (4) ne’ebé halo viajen ilegál tama Timor-Leste.

Iha parte seluk, UPF koordena mós ho Prezidente Autoridade Munisípiu Bobonaro no lia na’in sira no ekipa Ministériu Saúde no Bombeiru Maliana, envolve autoridade Igreja halo mós sosializasaun ba povu sira kona-ba prevene aan hosi COVID-19 tuir avizu ne’ebé Ministériu Saúde no Organizasaun Mundiál Saúde  (OMS) fó sai ona.

UPF mós husu ba autoridade suku sira-ne’e atu ajuda kontrola karik Timoroan mai hosi Kupang no Atambua tama ilegál mai Timor-Leste ba hela nonook ho família tenke hato’o keixa ba UPF no parte Ministériu Saúde.

Tuir observasaun Ajénsia Tatoli nota katak, ekipa Médiku Jerál Postu Integradu iha Batugade ne’ebé harii ona iha Merkadu Fronteira kontinua servisu makaas hodi kontrola kondisaun saúde  Timoroan sira nian, inklui lori ai-moruk rega loroloron iha fatin públiku hodi evita pandemia COVID-19.

Jornalista : Eugénia Pereira

Editór       : Francisco Simões

1 KOMENTÁRIU

  1. Obrigada barak ba esforsu UPF, obrigado barak ba pessoal sira iha UPF laran.
    nudar sidadaun ida, iha hanoin ida katak:
    Husu ba ministeriu Saude no ekipa ne’ebe responsavel iha Karantena loron 14 ba maluk sira husi estranjeiru. sira ne’ebe husi indonesia presija hare sira nia hela fatin iha provinsi ida ne’ebe??? para :
    1. identifika pronvinsi no tau ketak-ketak ho razaun katak sira husi Jakarta RISKU AS LIU ho sira nebe husi KUPANG. no seluk-seluk tan “nee laos diskriminasaun maibe oinsa para prevensaun ba virus corona ne’e rasik”. obrigado barak, bom trabalho, abraco forte, MAROMAK Acompanha nafatin Timor Oan Hotu.

HAKEREK NO HATÁN

Please enter your comment!
Please enter your name here