Ilustrasaun Coronavírus. Imajen/bncampinas.com

DILI, 24 marsu 2020 (TATOLI)–Rezultadu teste laboratóriu hosi Ospitál Darwin Austrália fó-sai timoroan kompostu mane na’in-haat ho feto na’in-ida la kona COVID-19 maski antes ne’e mosu síntoma hanesan coronavirus.

Vise-Ministra ba Kuidadu Saúde Primáriu, Élia António de Araújo dos Reis Amaral. Imajen/Egas Cristovão

Ministériu Saúde deskonfia suspeitu na’in-lima ne’e ho síntoma isin manas maka’as, me’ar no seluk tan hanesan COVID-19, tanba ne’e maka haruka kedas sampel raan ba Austrália foin lalais maibé rezultadu negativu.

Hosi suspeitu na’in-lima ne’e, na’in-rua Ministériu Saúde izola iha Ospitál Nasionál Guido Valadares (HNGV-sigla portugés), na’in-rua izola iha Ospitál Referál Munisípiu Covalima no na’in-ida seluk izola iha ninia uma rasik iha Dili.

Notísia Relevante :Timoroan Ida Deskonfia Kona Coronavirus

”Ita simu ona rezultadu ba ema suspeitu ba infesaun coronavirus na’in-lima ne’ebé ita haruka amostra ba Austrália hodi halo konfirmasaun ba teste ne’ebé ita-nia Laboratóriu Nasionál halo no ikus rezultadu fó-sai negativu,” relata Vise Ministra Saúde Primária, Élia dos Reis Amaral, iha konferénsia imprensa iha Palasiu Sinzas, Caicoli, tersa (24/03/2020).

Notísia Relevante :Timor-Leste Foin Deteta Kazu COVID-19 Ida

Ho rezultadu ne’e maka daudaun ne’e ekipa médiku sira deside ona hodi fó alta ba pasiente na’in-lima atu sai hosi fatin izolamentu tanba sira-nia saúde rekupera ona.

Governante kontinua apela ba sidadaun Timor iha Territóriu Timor-Leste atu mantein kalma no labele pániku kona-ba COVID-19.

“Fase liman bebeik ho sabaun kada oras, labele kaer liman no distánsia ema ida ho metru ida no tein hahan halo tasak antes han no iha ema ruma mak hetan síntoma me’ar no susar dada iis bele ba lalais Sentru Saúde ne’ebé mak besik,” apela Élia.

Jornalista : Felicidade Ximenes

Editór     : Agapito dos Santos

HAKEREK NO HATÁN

Please enter your comment!
Please enter your name here