Diretór Jerál Planu no Parseria, Ministériu Edukasaun Juventude no Desportu (MEJD), Antoninho Pires. Imajen/Tatoli

DILI, 24 marsu 2020 (TATOLI)-Ministériu Edukasaun Juventude no Desportu (MEJD), tersa (24/03/2020), klarifika ona ba públiku katak Profesór Portuguesa ne’ebé destaka iha Munisípiu Baucau la hetan coronavirus ka COVID-19.

MEJD fó klarifikasaun ne’e hodi responde rumoris ne’ebé espalla iha Munisípiu Baucau katak Profesór Portuguesa Ida dadaun ne’e hetan ona COVID-19, ne’e laloos no boatus.

Diretór Jerál Polítika Planeamentu Parseria, MEJD, Antoninho Pires, hateten iha sesta semana kotuk, Governu Portugal liuhosi ninia Embaixada iha Dili tenke evakua profesór Portuguesa na’in ualu hosi Munisípiu Baucau mai Dili tanba populasaun sira kondena katak na’in ida hosi profesór na’in ualu ne’e kona ona COVID-19.

“Ha’u hakarak dehan informasaun espalla iha Baucau katak ita-nia Profesór sira Portugal husi na’in ualu (8) ne’e ida deteta hetan coronavirus (COVID-19) ne’e sala no laloos,”reforsa Antonihno Pires ba TATOLI, iha Villa-Verde tersa (24/03/2020).

To’o oras ne’e seidauk identifika profesór Portuguesa ida maka mosu sintoma hanesan COVID-19. “Ami dismente ona informasaun ne’e ba públiku liuliu ba komunidade sira iha Baucau katak informasaun ne’ebé sira simu ne’e laloos no bosok,”tenik tan.

Profesór Portuguesa na’in ualu, oras ne’e hela provizóriu iha Otél Timor Dili. No sira hato’o ona pedidu hakarak fila ba Portugal maibé seidauk hetan aseitasaun hosi sira-ninia Governu rasik.

Tanba ne’e, MEJD husu ona ba sira atu mantein kalma hodi hela nafatin iha Timor-Leste to’o kontratu remata iha fulan dezembru 2020.

Iha 2020, Governu Timor-Leste servisu hamutuk ho Portugal kontrata ona Profesór Portuguesa sira hamutuk 138 maka destaka iha eskola públiku no CAFE iha Territóriu no sira-nia kontratu sei remata iha fulan-dezembru.

Jornalista : Tomé Amado

Editór     : Agapito dos Santos

HAKEREK NO HATÁN

Please enter your comment!
Please enter your name here