DILI, 24 marsu 2020 (TATOLI) – Tribunál Rekursu liuhosi enkontru nivel konsellu, segunda (23/03/2020), hasai ona sirkulár ida hodi suspende atividade julgamentu iha tribunál distritál sira, hodi prevene pandemia Coronavirus ka COVID-19 ne’ebé daudaun sai preokupasaun boot ba mundu, inklui Timor-Leste.
Juis Administradór Tribunál Distritál (TDD), Afonso Carmona, hateten, hahú tersa (24/03/2020), implementa ona sirkulár ne’e suspende atividade julgamentu baibain durante fulan ida no sei la’o normal fila-fali iha loron 26 abríl 2020.
“Atu evita pandemia COVID-19 no esforsu hotu-hotu nian kombate Coronavirus ne’e, tribunál mós iha interese ba atividade kontinuasaun julgamentu sira sei suspende,” hateten Juis Administradór TDD, Afonso Carmona, ohin, ba jornalista iha TDD, Dili.
Ba kazu julgamentu urjente relasiona ho primeiru interrogatóriu, prosesu sumáriu, embargu no providénsia kautela, Afonso Carmona hateten, tribunál bele halo atendimentu. Nune’e atu evita ema nia direitu labale lakon tanba ne’e prepara ona oráriu turnu kada loron juis na’in rua no ofisiais na’in tolu ho funsionáriu públiku atu atende servisu urjénsia sira.
Jornalista : Nelson de Sousa
Editór : Francisco Simões
