Komandante Jerál PNTL, Komisáriu Faustino da Costa. Imajen/António Gonçalves

DILI, 24 marsu 2020 (TATOLI)- Atu prevene pandemia Coronavirus ka COVID-19, Komandu Polisia Nasionál Timor- Leste (PNTL) deside suspende ona selebrasaun aniversáriu PNTL ba dala-XX ne’ebé sei realiza iha loron 27 marsu 2020.

Komandante Jerál PNTL, Komisáriu Faustino da Costa, informa, selebrasaun aniversáriu PNTL tenke adia  hodi koopera ho avizu ne’ebé fó sai hosi Governu Timor-Leste liuhosi Ministériu Saúde hodi husu ba povu Timor-Leste inklui entidade estadu nian atu evita halibur malu no buka hakmatek iha ida-idak nia uma.

“Ha’u fó ona orientasaun suspende totál ba atividade hotu hodi hein too situasaun normaliza,” hateten Komisáriu Faustino da Costa, ba jornalista sira iha Kuartél Jerál PNTL, Caicoli Dili, segunda (23/03/2020).

Nia dehan, estadu inklui Komandu PNTL konsidera pandemia COVID-19 perigu tebes ba saúde públiku, tanba virus ataka ema barak iha mundu mate ona.

“Ita hein fali tempu ruma komandu sei foti desizaun atu realiza fali aniversáriu PNTL nian bainhira,” tenik nia.

Nia hatutan, Komandu PNTL mós fó ona orientasaun ba Komandu Unidade Polisia Fronteira (UPF) hodi halo kontrolu másimu iha postu integradu fronteira terrestre, Batugade, Covalina no Oe-Cusse nian.

UPF sei halo kontrolu makaas iha fronteira para evita kualkér sidadaun labele tama ilegál hosi tasi no rai.

Ba sidadaun sira ne’ebé liu ilegál,  afirma Komisáriu Faustino da Costa, PNTL sei kaptura hodi entrega ba ekipa Médiku Jerál COVID-19 halo teste depois sei haruka ba hela iha fatin kuarentena hodi médiku akompaña sira-nia kondisaun saúde.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here