Provedora Direitu Umanu no Justisa (PDHJ), Jesuína Maria Ferreira Gomes. Imajen Tatoli/ Egas Cristóvão

DILI, 24 marsu 2020 (TATOLI) – Provedora  Direitus Umanu no Justisa (PDHJ), Jesuína Maria Ferreira Gomes, husu ba estadu atu kontinua foti medida apropriadu luta kombate pandemia Coronavirus ka COVID-19.

Notísia Relevante : Xanana Husu Povu Tomak Lalika Pániku Ba COVID-19

Liuhosi komunikadu imprensa hosi PDHJ ne’ebé Ajénsia Tatoli asesu,  tersa (24/03/2020), relata katak,   Provedora Jesuína Maria Ferreira, hato’o profunda preokupasaun ho risku hosi surtu COVID-19 ne’ebé rejistu tiha-ona kazu ida pozitivu iha Timor-Leste no iha ona mós suspeitu balun.

Nia dehan,  ho surtu COVID-19 fó risku ba saúde públiku no seguransa pesoál, tanba ne’e, PDHJ fó hanoin ba Estadu Timor-Leste katak Konstituisaun RDTL garante direitu, devér, liberdade no garantia fundamental sira inklui mós direitu no devér ekonómiku, sosiál no kulturál nu’udar direitu fundamental.

Partikularmente PDHJ bolu atensaun espesiál ba artigu 29 hosi KDRTL kona-ba direitu ba vida, Artigu 40 hosi KDRTL kona-ba liberdade ko’alia no simu informasaun ne’ebé loloos, artigu 57 hosi KDRTL kona-ba direitu ba saúde, no Artigu 36 KDRTL kona-ba onra no privasidade.

Notísia Relevante : Timoroan Na’in Lima Negativu ba COVID-19

“Obrigasaun Estadu relativamente ho luta hasoru surtu COVID-19 ne’e inklui garante direitus sivíl, kulturál, ekonómiku, polítiku no sosiál haktuir ba prinsípiu interdependénsia no indivilibilidade direitus umanus. Respeita total ba direitus umanus ne’e esensiál tebes iha etapa hotu-hotu durante surtu COVID-19,” hateten Provedoria Jesuína Gomes.

PDHJ kontinua husu Estadu tenke foti medida ne’ebé apropriadu hodi bele fó efeitu ba direitus, deveres, no liberdade ne’ebé hatutan iha Konstituisaun RDTL inklui foti medida-sira ne’ebé nesesáriu hodi prevene ameasa ba moris, seguransa no saúde ema nian.

“Ameasa ba propagasaun COVID-19 ne’e óbviu no sériu no tenke trata nu’udar urjente no imperativu hodi determina medida preventiva, preparasaun, kuarentena, izolamentu no tratamentu ba COVID-19. Medida hirak ne’e tenke sempre respeita ba direitus umanu no dignidade ema-nian,” nia hateten.

Provedora PDHJ Jesuína Maria Ferreira Gomes mós hato’o apresiasaun ba medida preventiva ne’ebé Governu Timor-Leste foti tiha-ona ba prevensaun, inklui medida temporáriu hodi fó restrisaun ba movimentu pesoál-sira husi nasaun ne’ebé afetadu. Inklui estabelese kuarentena obrigatóriu ba loron 14 ba sira-ne’ebé viajen hosi nasaun sira afetadu hosi COVID-19, inklui izolamentu no tratamentu ba pasiente ida ne’ebé pozitivu ho COVID-19.

PDHJ husu mós ba públiku atu pratika tuir maneira prevensaun hosi Ministériu Saúde no OMS atu fase liman ho sabaun beibeik no uza máskara.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here