Provedora Direitu Umanu no Justisa (PDHJ-sigla portugés), Jesuína Maria Ferreira Gomes. Imajen/Egas Cristovão

DILI, 24 marsu 2020 (TATOLI) – Provedora Direitu Umanu no Justisa (PDHJ) Jesuína Maria Ferreira Gomes, husu ba órgaun komunikasaun sosiál ka mídia atu kontinua fó informasaun pratika di’ak ba prevensaun Coronavirus ka COVID-19.

Notísia Relevante :  KI Husu Governu atu Hamosu Portokolu Medida Prevensaun ba Jornalista Sira

Liuhosi komunikadu imprensa hosi PDHJ, tersa (24/03/2020), Provedora Jesuína Maria Ferreira Gomes, konsidera, suspeitu pozitivu CIVID-19 na’in ida ne’ebé rejista hosi Ministériu Saúde no Organizasaun Mundiál Saúde (OMS) sériu ba Timor-Leste. Tanba ne’e, PDHJ afirma, katak, mídia nia publikasaun  importante atu kontinua fahe informasaun kona-ba pratika di’ak sira-ba prevensaun propagasaun COVID-19.

Nia hateten, informasaun sira-kona-ba medida ne’ebé Governu foti relativamente ho prevensaun, preparasaun, kuarentena, izolamentu no tratamentu ba COVID-19 tenke disponibiliza ba públiku.

“Husu atu utiliza kanál mídia oi-oin no involve/kolabora ho konviksaun relijiozu, organizasaun sosiedade sivíl, no lider komunitáriu hodi hatutan mensajen prevensaun ba komunidade, no asegura katak informasaun sira-ne’e asesivel ba ema hotu-hotu,” hateten Provedora Jesuína Gomes.

Nia dehan tan, lingua ka formatu ba prevensaun COVID-19 buka atu fasilita ema  komprende no responde ba nesesidade espesiál ba labarik-sira, ho defisiénsia matan no tilun, no sira ne’ebé ho abilidade limitadu ba sani no hakerek ka sira ne’ebé analfabetu, inklui detidu-sira iha prizaun ka fatin detensaun.

Notísia Relevante : Jornalista Labele Fiar Fonte Ne’ebé La Klaru

Informasaun relasiona ho prevensaun propagasaun COVID-19 tenke hato’o ba públiku ho maneira oportuna. Tanba ne’e,
Provedora Jesuína Maria Ferreira Gomes,  preokupa ho akontesimentu loron hirak liu-ba, hafoin Ministériu Saúde fó-sai informasaun kona-ba kazu suspeitu COVID-19 hatudu katak iha duni difikuldade atu mantein privasidade ba identidade indivíduu-sira. Tanba COVID-19 hada’et hosi ema ba ema, iha tendénsia haree ba kontestu iha Timor-Leste komunidade ne’ebé ta’uk sei reaje ho hirus no halo ameasa ba ema ne’ebé da’et ona COVID-19.

“Sirkunstánsia ne’e sei la enkoraja ema ne’ebé suspeitu ba COVID-19 ba halo teste tanba ta’uk reasaun hosi komunidade, sei iha impaktu boot ne’ebé ema seluk hatudu sintoma sei ta’uk atu hakbesik-aan ba professional saúde, no moras sei hada’et nafatin,” dehan Jesuína Maria Ferreira Gomes.

Provedora Jesuína Gomes husu ba pesoál saúde tenke kumpre sira-nia juramentu atu labele divulga ema nia identidade ba públiku. Parte esensiál ba tratamentu pasiente ida ho dignidade mak respeita no garante ema nia privasidade no rai metin rejistu médiku ka informasaun saúde pasiente nian.

Jornalista : Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here