Prezidente Repúblika, Francisco Guterres Lú Olo, prezide reuniaun Konsellu Superior Defeza no Seguransa, iha Palásiu Prezidente Nicolau Lobato, Bairru-Pite, Dili, Tersa (24/03/2020). Imajen Tatoli/Egas Cristovão.

DILI, 24 marsu 2020 (TATOLI)–Xefe Kaza Sivíl Prezidénsia Repúblika Francisco María de Vasconcelos hateten, ohin ka tarde liu aban, Prezidente Repúblika (PR), Francisco Guterres “Lú Olo”, haruka proposta Estadu Emerjénsia ba Parlamentu Nasionál (PN) hodi husu autorizaun atu Xefe Estadu dekreta. 

Xefe Kaza Sivíl hato’o asuntu ne’e, hafoin akompaña reuniaun Konsellu Superior Defeza no Seguransa (KSDS) ho Konsellu Estadu (KE), iha Palásiu Prezidensál Bairru Pité, Dili.

“Ohin duni ka tarde liu aban, sei haruka ba Parlamentu Nasionál. Tanba ne’e urjente no kleur liu mak aban no Prezidente Repúblika sei Haruka ba Parlamentu Nasionál. Bainhira PN autoriza, Prezidente sei dekreta Estadu Emerjénsia,” dehan Xefe Kaza Sivíl Prezidénsia Repúblika, Francisco María de Vasconcelos, ba jornalista sira, ohin.

Rezumu ba rezultadu reuniaun Konsellu Superior Defeza no Seguransa no mós Konsellu Estadu, nia hatutan, elasiona ho pedidu Governu nian ba Estadu Emerjénsia. Prezidente Repúblika horseik iha tuku 12:45, simu pedidu hosi Governu, ne’ebé husu ba Prezidente Repúblika atu dekreta Estadu Emerjénsia.

Bainhira Prezidente simu tiha pedidu ne’e, nia dehan, Prezidente konvoka kedan reuniaun ba Konsellu rua ne’ebé realiza duni iha loron ohin. Iha dadeer, PR hala’o reuniaun ho Konsellu Superior Defeza no Seguransa no foin dadauk mak ramata reuniaun entre  Konsellu Estadu ho PR.

“Prezidente Repúblika, konvida mós ema tékniku na’in rua mak doutór Rui Maria de Araújo ho doutora Daninha Coelho, atu fó mós opiniaun ba Konselleiru sira. Konselleiru sira mós iha sira ninia opiniaun, ne’ebé fó ba Prezidente Repúblika atu hato’o karta ba Parlamentu Nasionál atu autoriza hodi bele dekreta Estadu Emerjénsia,” noa dehan.

Entretantu, Reuniaun Konsellu Superior Defeza no Seguransa nian hahú iha tuku 9 dadersan no termina iha tuku 11, no enkontru ho membru Konsellu Estadu hahú iha tuku 11:10 remata iha tuku 13:05.

Membru Konsellu Estadu ne’ebé partisipa iha reuniaun ne’e maka, Prezidente Repúblika Francisco Guterres Lú Olo, Primeiru-Ministru Taur Matan Ruak, Prezidente Parlamentu Nasionál Arão Noé, Eis Prezidente Repúblika José Manuel Ramos Horta no membru ne’ebé nomea husi Prezidente Repúblika: Oscar Lima, Alcino de Araújo Barris, Maria Dadi Soares Magno, Laura Soares Abrantes, Faustino da Costa no nomea husi Parlamentu Nasionál: Eduardo de Deus ‘Dusae’, Aurora Ximenes, José Cornelio Guterres, Árcangelo de Jesus Gouveia Leite, José dos Santos ‘Naimori Bucar’, konvida mos Eis Primeiru Ministru no Ministru Saúde Rui Araújo no Infectologista Danihna Coelho no Diretór Ezekutivu FONGTIL Daniel Santos.

Notísia Relevante: Konsulta Entre Xefe Estadu ho KSDS ba Estadu Emerjénsia Sériu Liu

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here