Ezemplu lixu sira ne'ebé namkari iha kapitál. Imajen Egas Cristovão

DILI, 23 marsu 2020 (TATOLI)–Xefe Departamentu Saneamentu Munisípiu Dili, Domingos Soriano hateten, Governu liuhousi Ministériu Obras Públika (MOP) kontrata kompañia tolu mak hala’o serbisu hodi rekolla lixu todan sira iha Sidade Dili.

Kompañia tolu, nia hatutan, mak hanesan Kompañia Nelcec, Parapa, no Labailay mak kobre postu haat iha Dili laran liuliu hodi rekolla lixu sira hafoin akontese dezastre natrurál ne’ebé hamosu inundasaun hodi estraga sasán, sobu infraestrutura balun no halo lixu naklekar iha área afetada sira.

“Ami husi saneamentu iha serbisu rua. Ida, serbisu kmaan no ida seluk mak serbisu todan. Serbisu todan enatun ita entrega ba kompañia tolu hanesan Nelces, Parapa no Kompañia Labelay mak hodi rekolla lixu, kobre hosi Postu Administrativu haat iha Dili,” dehan Xefe Departamentu Saneamentu Munisípiu Dili, Domingos Soriano, ba Ajénsia TATOLI iha nia knaar fatin, Matadouro, Dili, ohin.

Nia informa, tanba de’it inundsaun iha semana kotuk ne’ebé kauza husi udan-boot entaun kompañia ho nia kareta ne’ebé toma responsavel ba Postu Administrativu Dom Aleixo nian kolabora fali ho Postu Administrativu Na’in Feto nian hodi rekolla lixu sira iha Dili laran.

“Ita hotu hatene katak iha inundasaun ne’e akontese de’it ba Postu Administrativu Na’in Feto ho Cristo Rei. Entaun, kompañia tolu ho nia kareta ne’e tenke rekolla lixu iha fatin refere tanba komunidade sira husi fatin ne’e mak afeta tebes ba inundasaun,” nia hatutan.

Tanba ne’e, nia dehan, ekipa saneamentu kontinua iha vontade no esforsu atu hamoos foer ne’ebé durante ne’e sira mós seidauk foti iha ofisina sira. Entaun, ohin, sira hamoos no rekolla lixu no iha ekipa balu fase tutuir dalan públiku ne’ebé seidauk moos.

“Ami-nia ekipa saneamentu kontinua iha vontade no esforsu atu hamoos fatin sira ne’ebé mak durante ami seidauk foti hanesan iha ofisina sira, ” nia dehan.

Notísia Relevante: Ekipa Saneamentu Halibur Taho-Teen, Ekipamentu Pezadu Mak Bele Suru

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here