Portavós Koloigasaun Aliansa Maioria Parlamentár (AMP) no Atuál Sekretáriu Jerál Partidu Demokrátiku, António da Conçeição, no Prezidente Koligasaun Foun, Kay Rala Xanana Gusmão. Imajen Tatoli/Egas Cristóvão.,

DILI, 24 marsu 2020 (TATOLI)—Koligasaun Foun ne’ebé lidera hosi Partidu CNRT, husu ba Prezidente-Repúblika, Francisco Guterres “Lú Olo”, atu foti ona desizaun ba prosesu hotu-hotu inklui aseita karta pedidu demisaun hosi Primeiru-Ministru (PM), Taur Matan Ruak nian.

“Koligasaun liuhosi meiu ida-ne’e hato’o ba Prezidente Repúblika hodi konsidera prosesu hotu-hotu ne’ebé Prezidente-Repúblika rasik hala’o inklui aseita demisaun ba Primeiru-Ministru tuir artigu 112 Konstituisaun RDTL ho nune’e loke ona ba formasaun IX Governu Konstitusionál tuir artigu 106 Konstituisaun Repúblika, hodi responde ba situasaun ne’ebé país hasoru hanesan Coronavirus no inundasaun ne’ebé akontese daudaun,” Portavós Koloigasaun Aliansa Maioria Parlamentár (AMP) no Atuál Sekretáriu Jerál Partidu Demokrátiku, António da Conçeição, ejize liuhosi konferénsia imprensa iha Sede CNRT, Bairro dos Grilhos, Dili, tersa ne’e.

Tuir nia, ohin, pedidu demisaun ne’ebé Primeiru-Ministru atuál hato’o kompleta ona fulan-ida maibé Prezidente Repúblika seidauk foti desizaun. Primeiru-Ministru, Taur Matan Ruak aprezenta karta demisaun ba Prezidente Repúblika iha loron 24 fulan fevereiru 2020.

Entretantu, Prezidente Koligasaun Foun, Kay Rala Xanana Gusmão afirma, atu solusiona inserteza polítiku iha rai-laran iha xefe estadu nia liman.

Konferénsia Imprensa ne’e partisipa hosi Partidu Congresso Nacional para a Reconstrução de Timor (CNRT), Partidu Kmanek Haburas Timor Oan (KHUNTO), Partido Democratico (PD), Partidu Unidade Desenvolvimento Democratico (PUDD), Partido Frente Mudança (FM) no Partido União Democratica (UDT).

Notísia Relevante: Koligasasun Foun Reafirma Sólidu no La Fó Dalan Ba Tentativa

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here