Imajen/Osoria Marques

DILI, 24 marsu 2020 (TATOLI)–Konsellu Imprensa (CI-sigla portugés) husu ba Governu imor-Leste, Ajénsia no Autoridade kompetente sira hanesan Ministériu Saúde (MS) no Task Force COVID-19 hodi halo prevensaun ba jornalista sira durante hala’o knaar jornalístika nian.

Konseleiru Konsellu Imprensa, Francisco Simões da Costa Belo hateten, relasiona ho prevensaun no kazu COVID-19 ne’ebé deteta ona iha Timor-Leste, parte Governu tenke kria portokolu komunikasaun ida atu bele fasilita jornalista sira-nia kobertura iha terrenu.

“Konsellu Imprensa husu ba Governu atu hamosu portokolu komunikasaun ida relasiona ho prevensaun propagasaun COVID-19. Tanba portokolu ne’e bele sai hanesan matadalan ba jornalista sira durante hala’o sira-nia knaar iha terrenu,” dehan Konseleiru Konsellu Imprensa, Francisco Simões da Costa Belo, ba jornalista sira liuhosi konferensia imprensa iha Salan Konsellu Imprensa, Quintal Boot, Dili, ohin.

Nia husu ba Governu, asesu natón ba jornalista sira hosi medida hotu-hotu hodi hetan informasaun lahõ diskriminasaun inklui fasilidade atu halo tradusaun komunikadu ba lian ofisiál no lian serbisu nian.

Atu informa períodu antesedensia ne’ebé razoável ba jornalista sira kona-ba atividade Governu liuliu ekipa task force COVID-19 nian, nia hatutan, bainhira anúnsia informasaun importante no urijente kona-ba COVID-19 hodi fasilita kobertura jornalista ne’ebé ho adekuadu.

“Governu fó garante ba jornalista sira hodi hala’o sira-nia serbisu iha fatin públiku liuliu fonte informasaun prisinpál sira, garante mós ba jornalista sira-nia knaar jornalístika ho livre no responsável, evita utiliza medida violentu sira (baku/insulta) hasoru jornalista,” nia dehan.

Entretantu, nia husu ba públiku kona-ba COVID-19 ne’ebé oras ne’e ataka daudaun umanidade no povu Timor-Leste mós hola parte hotu, tanba ne’e la iha dalan ka fatin seluk atu sees-an maibé hamutuk hodi halo prevensaun.

“Vírus corona ne’e peste perigozu ida ne’ebé oras ne’e ataka daudaun Umanidade no povu Timor-Leste mós hola parte. Nu’udar parte komunidade umana ne’e, ita la iha dalan ka fatin seluk atu sees-an. Dalan ne’ebé iha mak hamutuk hodi halo prevensaun,” nia dehan.

Nia husu ba públiku bainhira fahe infomasaun labele sai fonte ba rumor ka lia-bosok sira. Tanba ne’e, nia apela ba públiku katak COVID-19 la diskrimina ema entaun públiku mós labele halo diskriminasaun ba malu.

“Coronavirus (COVID-19) la diskrimina ema. Tan ne’e, atu hasoru no halakon nia, ita mós labele diskrimina malu, satán despreza malu,” nia dehan.

Notísia Relevante: Jornalista Labele Fiar Fonte Ne’ebé La Klaru

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here