Pasajeiru Aviaun Citilink bainhira to’o iha Aeroportu Prezidente Nicolau Lobato, Comoro, Dili. Imajen Tatoli/António Gonçalves

DILI, 24 marsu 2020 (TATOLI) – Relasiona ho pandemia COVID-19 ne’ebé infiltra ona ba nasaun barak iha mundu inklui Timor-Leste, ne’ebé hetan ona kazu pozitivu ba ema na’in-ida, maka Governu hahú halo medida prevensaun, inklui fó limitasaun ba movimentu iha Aeroportu, Fronteira no Portu.

Prezidente Autoridade Aviasaun Sivíl Timor-Leste (AACTL, sigla portugés),  Ana Rosália Varella, informa, relasiona  ho situasaun COVID-19 ne’e, aviaun haat ne’ebé halo opersaun iha Timor-Leste  hatama ona pedidu limitasaun operasaun voo ba AACTL ba semana ida dala ida.

“Ha’u simu ona pedidu husi Citilink, Transnusa no  Royal Butan Air lines. Iha pedidu ne’e hateten sira nian hakarak halo opersaun voo semana ida dala ida tanba kauza husi Moras Coronavírus ne’ebé tama ona iha ita-nian rai ne’ebé tuir publikasaun Ministériu Saúde, ita-nian rai iha ona suspeitu  ida. Tanba ne’e sira husu pedidu mai ami”, dehan Ana Rosália ba Agência Tatoli, tersa ne’e.

Nia adianta, pedidu ne’e la’ós de’it ba husi Citilink, Trasnusa no  Royal Butan Air lines maibé mós husi parte ACCTL mós hetan pedidu hanesan husi empreza Sriwijaya.

“Ohin empreza Sriwijaya mós hatama sira-nia pedidu mai ami maibé ha’u seidauk lee. Parese pedidu ne’ebé sira hatama hanesan de’it, razaun katak tanba moras Coronavírus”,nia akresenta.

Nia informa,  razaun ne’ebé empreza aviasaun sira hatama pedidu halo redusaun voo, tanba kestaun seguransa ba ema-nia vida no haree ba situasaun Coronavírus.

Responsável ne’e konsidera, seguransa ba ema-nia vida mós perigu iha koteksu aviasaun nian tanba liga ho seguransa pesoál no haree mós ba virus ne’e limita ona ema ninia movimentu ba li’ur no laiha pasajeiru.

“Importante ita tenke asegura ema-nia vida, maibé ho situasaun sira ne’e, ita labele asegura ema-nia vida. Razaun seluk maka ho Coronavírus ne’e halo limita ema ninia movimentu ba rai-liur no fó impaktu ba rendimentu”, nia salienta.

Nia refere liután, kona-ba aviaun Air North Austrália halo ona operasaun normál loron-loron maibé sira tula sira-nia ema husi Timor-Leste, filafali ba Austrália maibé timoroan atu ba rai-li’ur sira labele lori.

Ana Rosália subliña, bainhira situasaun la’o normál fali maka aviaun sira hanesan Citilink, Transnusa no Royal Butan Air lines sei halo operasaun hanesan bain-bain.

“Ita labele husik situasaun Coronavírus la’o hela maka ita halo operasaun aviaun ba mai, tanba vírus ne’e bele lori ameasa  ba nasaun hotu inklui Timor-Leste tanba hetan ona kazu pozitivu, tanba ne’e aviaun labele halo operasaun ho normál”, nia dehan tan.

Iha sorin seluk, Diretór Jerál Aviaun Sriwijaya Air, Dirham Wahayudi, hateten desde fulan tolu ikus, hahú husi janeiru to’o marsu, númeru pasajeiru menus.

“Ami-nia pasajeiru tinan kotuk liubá ne’e diak, loron ida bele hetan 70 to’o 80 pasajeiru, maibé kompara ho tinan agora desde iha janeiru to’o marsu agora, ami-nia pasajeiru tun bele loron ida 40 to’o 30 de’it liga ho kazu Coronavírus ne’e. Ami-nia pasajeiru tun tanba aeroportu iha nasaun balun Lockdown bazeia ba desizaun husi nasaun balun, inklui Indonézia ne’ebé la autoriza viza livre hanesan bain-bain. Tanba ne’e ba oin ami sei defísil”, nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here