Juíz Administradór Tribunál Distritál Baucau (TDB), José Gonçalves. Imajen/FB José Gonçalves

DILI, 24 marsu 2020 (TATOLI) – Juíz Administradór Tribunál Distritál Baucau (TDB), José Gonçalves, informa katak nia parte simu ona informasaun direita husi juiza ida ne’ebé durante ne’e deskonfia afetadu COVID-19 no ninia rezultadu negativu.

“Ohin, nia (juiza) informa ona ha’u, no ohin mós sira prosesa nia atu livre ona husi auto-kuarentena”, informa juiz José Gonçalves ba Agência Tatoli via telefónika, tersa ne’e.

Juíz Administradór TDB adianta, juiza ne’e rasik ohin konfirma katak rezultadu teste negativu ne’e mai husi Austrália.

Nia haktuir, biban ne’e juiza ne’e agradese ba kolega juíz no maluk sira hotu, ne’ebé mak durante ne’e halo suporta no orasaun ba nia iha situasaun difísil.

Hatan kona-ba bainhira mak juiza ne’e tama fali serbisu, nia dehan TDB liuhosi konsellu hasai ona deliberasaun urjente ida, hahú 24 marsu to’o 24 de abríl, atu suspende ninia atividade hodi la atende julgamentu.

Maske nune’e, sei atende de’it ba kazu sira ne’ebé mak ho karaktér urjénsia.

“Ezemplu maka prezu no detidu sira ho prosesu sira ne’ebé mak ho karatér urjénsia ba prosesu providénsia kautelár”, nia akresenta.

Jornalista: Domingos Piedade Freitas

Editora: Julia Chatarina

HAKEREK NO HATÁN

Please enter your comment!
Please enter your name here