Imajen Espesiál

DILI, 24 marsu 2020 (TATOLI)–Konseleiru Konsellu Imprensa, Francisco Belo Simões da Costa, hateten, jornalista ka orgaun komunikasaun social sira hotu atu labele fiar fonte informasaun ne’ebé la klaru.

“Ita labele fiar fonte informasaun ne’ebé mak la klaru iha mídia sosiál (facebook) ne’ebé fó sai informasaun hoax atu halo pániku komunidade sira,” dehan Konseleiru Konsellu Imprensa, Francisco  Belo Simões da Costa, ba jornalista sira liuhosi konférensia imprensa iha Salaun Konsellu Imprensa, Quintal Boot, Dili, segunda ne’e.

Nia dehan, relasiona ho kazu Covid-19 situasaun ezize parte hotu atu esforsu inklui imprensa ho nia profesionál sira atu aplika meiu ida hodi redúz impaktu husi peste letal ne’e.

“Situasaun ne’ebé ita hasoru daudaun ne’e relasiona ho propagasaun Covid-19 tanba ne’e situasaun ezize ita hotu-hotu nia esforsu inklui imprensa ho nia profesionál sira hodi buka dalan nune’e redúz impaktu husi peste letal ne’e,” nia dehan.

Tanba ne’e, nia apela ba jornalista sira hotu tenke ho identifikasaun profesionál iha direitu atu asesu ba fatin públiku sira nune’e bele hala’o serbisu jornalístika.

“Maske nune’e, jornalista iha dever atu respeita barreira no limitasaun ne’ebé autoridade kompetente sira tau nu’udar medida atu proteje komunidade ruma husi propagasaun Covid-19,” nia hateteten.

Relasiona Covid-19,  nia dehan, liberdade atu asesu ba fonte informasaun maibé tenke konsidera nu’udar direitu jornalista nian ne’ebé sei hala’o ho forma ne’ebé livre no responsável hosi jornalista ida-idak.

“Mídia na’in labele halo obrigatoriamente ba jornalista sira hodi tau sira iha fatin perigu integradu fízika. Tanba sira mós ema umanu vulnerável ba propagasaun Covid-19. Sira iha dever atu halo medida preventiva ba sira an ne’ebé mak Ministériu saúde (MS) no  Organizasaun Saúde Mundiál ( OMS) alerta sai,” nia esplika.

Aleinde ne’e, nia dehan, MS ho OMS hatete halo distansia sosiál entre ema ida ho ema seluk ho metru ida no mós halo prevensaun ba ekipamentu jornalístiku nian hanesan telefone, kamera no seluk tan.

Nia husu ba jornalista sira atu kaer metin kode étika jornalístika bainhira deside atu halo indentifikasaun ba komunidade ne’ebé suspeitu ba COVID-19 ka afetadu ba COVID-19.

“Jornalista garante katak elaborasaun notisia hotu ne’ebé nia kobre sei la hamosu situasaun inseguru ka ameasa ba integradu fízika. Importante liu ba jornalista sira mak halo verifikasaun, konfirmasaun no halo klarifikassun ba fonte informasaun liuliu autoridade kompetente ne’ebé sai obrigasaun prisinpál molok públika notisia,” nia hateten.

Jornalista : Osória Marques

Editór     : Cancio Ximenes

HAKEREK NO HATÁN

Please enter your comment!
Please enter your name here