Ofisial membru Polisia Nasional Timor Leste wainhira halao hela seguransa iha fatin kuarentena sira. Imajen/Antonio Goncalves

DILI, 24 marsu 2020 (TATOLI)–Ema deskoñesidu, horisehik, purvolta tuku 19:00 Otl, lori rama ambon hana joven ida ho inisiál OS iha área estrada Suku Tuana-Laran, Postu Administrativu Vera Crúz, Munisípiu Dili.

Notísia Relevante : Ema Deskoñesidu “Oho” Ferik Ida iha Becora

Rama ambon kona kedas iha vítima nia kalilin bainhira nia ho motor fila hosi Comoro atu ba nia-uma iha Tualaran, Dili.

Komandante Polísia Munisipiu Dili, Superintendente Xefe Armando Monteiro, hateten, daudaun ne’e vítima hala’o hela tratamentu intensivu iha Ospitál Nasionál Guido Valadares (HNGV-sigla Portugés).

“Atividade krime akontese hodi kalan iha fatin rua, ida iha Balide no ida iha Matadouro. Ema hana ita-nia joven ida ho inisiál OS hanesan dezobediénsia ba lei númeru 5/2017 (arma branka),” afirma Armando Monteiro, ohin, ba jornalista iha Komandu Polísia Munisípiu Dili.

Armando dehan, parte PNTL liuhosi intelijénsia no Ofisiál Polísia Suku (OPS) no autoridade suku buka tuir ona paradeiru suspeitu hodi bele kaptura.

PNTL mós rekolla ona informasaun husi vítima no família vítima para buka hatene motivu husi kazu hana ne’e rasik.

PNTL mós kontinua asegura seguransa metin iha kapitál Dili, inklui monta membru sira halo kontrolu másimu ba timoroan sira ne’ebé hela iha fatin kuarentena Otél Audian, Otél Novo Horizonte inklui área Tibar nian.

Jornalista : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here