Ekipa PCIC foti hela mate isin ferik ida ne’ebé mate iha área Aldeia Sabraka-Laran, Suku Becora. Imajen/Eugénio Pereira

DILI, 24 marsu 2020 (TATOLI)- Komunidade área Sabraka Laran, Aldeia Mota Ulun, Suku Becora, Postu Administrativu Kristu Rei, Munisípiu Dili, hodi kalan tuku 23:00 Otl, hetan mate isin feto ida ho identidade la klaru ne’ebé deskonfia “oho” hosi ema deskoñesidu.

Akontesimentu ne’e halo populasaun sira iha área Sabraka Laran hakfodak no ta’uk, tanba mate-isin deskoñesidu ne’ebé ho kondisaun ran-nakfakar  soe kedas iha komunidade sira-nia uma leet.

Komandante Polísia Munisípiu Dili, Superintendente Xefe, Armando Monteiro ho ekipa Polísia Eskuadra Becora  too kedas fatin akontesimentu hodi orienta ekipa dada Polisia Line submete investigasaun.

Mate isin ne’e, parte investigasaun PNTL dezde hodi kalan labele foti, tanba parte PNTL rasik la iha ekipamentu atu foti mate isin hodi evita aan hosi prevensaun pandemia Coronavirus ka COVID-19.

Mate isin ne’e hein too ohin dadeer, tuku 9:00 Otl, maka ekipa Polísia Sientífiku Investigasaun Kriminál (PCIC) akompaña ekipa forensik   no Polísia Eskuadra Kristu Rei, foti lori ona ba Ospitál Nasionál Guido Valadares  (HNGV) hosi halo autópsia.

Antes foti mate isin, ekipa PCIC halo uluk investigasaun iha terrenu hodi rekolla dadus nota katak, vítima nia ulun hetan pankada makaas too nakfera.

“Tia ne’e nia ulun nakfera ne’e kauza hosi agresaun fíziku hosi ema deskoñesidu, tanba ne’e  raan sai makas,” informa membru PCIC sira durante halo identifikasaun.

Iha parte seluk, Xefe Suku Becora, António da Silva Soares, ne’ebé marka prezensa iha fatin akontesimentu husu ba autoridade kompetente atu halo investigasaun profunda.

Parte PNTL Eskuadra Kristu Rei liuhosi Ofisiál Polísia Suku (OPS), Membru Konsellu Polisiamentu Komunitáriu (KPK) koordena ona ho parte autoridade no komunidade sira hahú rekolla informasaun no buka tuir identidade vítima no nia família sira.

Tuir Komunidade Aldeia Mota Ulun, Domingos Gomes dehan, parte komunidade observa vítima ne’e sofre moras mentál no durante semana rua mai hosi munisípiu balun loro-loron halo atividade toba iha de’it Loja Julião Orlean da Silva nia-oin.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here