Ministru Negósiu Estranjeiru no Kooperasaun, Dionísio da Costa Babo Soares. Imajen/Egas Cristóvão

DILI, 24 marsu 2020 (TATOLI)–Ministru Negósiu Estranjeiru no Kooperasaun (MNEK), Dionísio Babo Soares, konsidera enkontru entre Prezidente Repúblika (PR), Francisco Guterres Lu Olo ho Konsellu Superior Defeza no Seguransa (KSDS) ho Konsellu Estadu sériu liu, liga ho asuntu COVID-19. 

“Konsulta entre Prezidente Repúblika nian ho Konsellu Estadu no Konsellu Seguransa ne’e mais duke sériu, la’ós sériu de’it, maibé, mais duke sériu”, dehan Dionísio Babo Soares ba jornalista sira hafoin partisipa enkontru Konsellu Superior Defeza no Seguransa iha Palásiu PR, Bairru Pité, Dili.

Prezidente Repúblika, Francisco Guterres Lú Olo, prezide reuniaun KSDS hodi halo analiza hamutuk kona-ba pedidu husi Governu atu deklara Estadu Emerjénsia, liga ho COVIC-19.

Reuniaun ne’e hahú tuku 9.00 termina tuku 11.00, maibé seidauk iha deklarasaun ruma kona-ba rezultadu enkontru.

Oras ne’e daudaun, Prezidente Repúblika kontinua hala’o enkontru ho membru Konsellu Estadu ne’ebé hahú iha tuku 11.10.

Membru Konsellu Superior Defeza no Seguransa ne’ebé partisipa iha reuniaun ne’e mak: Prezidente Repúblika Francisco Guterres Lú Olo, Primeiru Ministru Taur Matan Ruak, Ministru Negosiu Estranjeiru no Kooperasaun Dionísio Babo, Ministru Defeza no Seguransa Filomeno Paixão, Ministru Justisa Manuel Carceres, husi Parlamentu Nasionál, Aderito Hugo da Costa, David Dias Ximenes, Xefe Estadu Maior Jeneral F-FDTL Lere Anan Timur, Komisáriu PNTL Faustino da Costa, Eis Primeiru-Ministru no Ministru Saúde Rui Maria Araújo, José Manuel Fernandes ‘Nakfilak’, Infectologista Danina Coelho, no Diretor Ezekutivu FONGTIL Daniel Santos.

Notísia Relevante: Aban, Xefe Estadu ho KSDS no Konsellu Estadu Diskute Estadu Emerjénsia

Jornalista : Cipriano Colo

Editór    : Cancio Ximenes

HAKEREK NO HATÁN

Please enter your comment!
Please enter your name here