Xefe Bankada CNRT, Duarte Nunes. Imajen Tatoli/Egas Cristóvão

DILI, 24 marsu 2020 (TATOLI)—Xefe Bankada Parlamentár CNRT, Duarte Nunes hateten, pedidu estraordinária atu halo levantamentu ba fundu petrolífetu importante liu proposta alterasaun Lei Orsamentu no Jestaun Finanseira.

“Ita tenke haree pedidu ida-ne’ebé mak importante liu iha momentu ne’e. Tuir ami (CNRT) importante liu mak foti osan (pedidu levantamentu ba fundu petrolíferu) hodi atende situasaun ne’ebé ita hasoru ne’e. Ida-ne’e mak só urjénsia. Ne’e mak ami-nia pozisaun. Ita, sei haree aban,” dehan Duarte Nunes ba jornalista sira iha resintu Parlamentu Nasionál, tersa ne’e.

Tuir ajenda, nia hatutan, aban sei halao diskusaun no aprovasaun ba ba pedidu ne’e ho karáter urjénsia ba Proposta Lei no.12/V (2a)-alterasaun datoluk lei no.13/2009, de 21 de outubru kona-ba Orsamentu no Jestaun Finanseira.

Tuir nia, pedidu levantamentu ba fundu petrolíferu importante liu ba situasaun atuál hodi responde dezastre naturál ne’ebé akontese no prevensaun hasoru COVID-19 (Coronavirus).

Xefe Bankada CNRT ne’e fó-sai katak pedidu levantamentu ne’e baixa ona ba Komisaun C (Finansa Públika) no ohin komisaun C sei aprova relatóriu no parser no aban aprezenta ba plenária.

“Karik aban ida hadi’a lei (proposta aletarasaun) ne’e hetan aprovasaun, aban ami sei diskute kedas pedidu levantamentu ne’e. Proposta alterasaun no pedidu husu osan la hanesan. Ami hanoin pedidu ida husu osan ne’e mak urjente liu, ida hadi’a lei dada ba ikus la iha buat ida. Tanba ne’e mak ami dehan ami ba ida nesesidade ida urjente atu aprova osan,” nia dehan.

Xefe Bankada CNRT ne’e dehan, proposta alterasaun ne’e diskute iha prosesu normál la’ós ho karáter urjénsia.

“Karik la aprova aban, signifika prosesu normál tenke iha audiénsia ho ministériu sira-ne’ebé relevante,” nia hateten.

Entretantu, Deputadu Partidu Libertasaun Populár (PLP), Francisco Vasconselos hateten, Governu husu alterasaun tanba atu fó resposta ba dezastre naturál no oras ne’e Coronavirus.

“La iha ema ka governu ida ho intensaun altera lei hodi hariku nia-an, ne’e laiha. Se dehan urjénsia ka lae, ami dehan urjénsia. Se Orsamentu Jerál Estadu liu karik entaun agora ita deskute iha ne’e ida,” ia dehan.

Deputadu FRETILIN, Francisco Branco, alterasaun ne’e atu halo rezolve problema nasionál, tanba ne’e labele halimar ho kór polítika.

“Ita-nia estadu emerjénsia nasionál tanba ne’e tenke debate urjénsia duni ba alterasaun ne’e. Ha’u hanoin haree kestaun ne’e ho konsiénsia estadu nian. Sé mak kria situasaun ne’e hodi la viabiliza governu tanba ne’e alterasaun ne’e pertinente hodi fó solusaun bai ta-nia problema,” nia esplika.

Notísia Relevante: PN Simu Ona Pedidu Levantamentu Sustenta Mákina Estadu

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here