Arsebispu Metropolitana Dili no Pro-Prezidente CET, Dom Virgilio do Carmo da Silva, SDB. Imajen Tatoli/Cipriano Colo.

DILI, 24 marsu 2020 (TATOLI)–Conferénsia Episcopal Timorense (CET), ohin, ofisialmente deside no fó sai anunsiu pontu hitu (7) inklui husu sarani sira atu akompaña misa Paskál tinan ne’e iha uma de’it hodi evita Coronavirus (COVID-19).

Desizaun ne’e anunsia liu husi konferénsia imprensa, ne’ebé lee husi Arsebispu Metropolitana Dili no Pro-Prezidente CET, Dom Virgílio do Carmo da Silva, SDB, iha Sekretariadu Konferénsia Episcopal Timorense Rua 12 Novembru, Balide, Dili, Timor-Leste.

Conferénsia Episcopal Timorense (CET) fó orientasaun no desizaun sira kona-ba oinsá atu selebra festa boot Páskua nian.

Primeiru, husu ba amu lulik sira atu bele lee, kumpre no divulga DEKRETU PAPAL kona-ba COVID-19.

Segundu, tuir dekretu ida ne’e duni, Amu Bispu sira deside katak selebrasaun litúrjika sira hotu, maski iha tempu Paskál, la iha partisipasaun povu (sarani sira).

Terseiru, sarani sira tuir selebrasaun iha sira-nia uma, bainhira misa liuhosi rádiu no televizaun, biar la simu komuñaun eukaristika maibé halo komuñaun espiritual (sei fornese fórmula ida ba sarani sira atu hala’o komuñaun espiritual).

Kuartu, baibain ita hatene katak misa sem komuñaun misa la kompleta maibé haree ba situasun ida hanesan ne’e, tempu kalamidade públika no mundiál, uma Kreda dispensa sarani sira hosi komuñaun eukarístika no konvida sarani sira halo komuñaun espiritual.

Kintu, atu evita perigu kontájiu, husu ba amu lulik sira atu tuir rigorozamente orientasaun no desizaun Amu Papa no Conferência Episcopal Timorense (CET) nian ne’e.

Sestu, amu lulik sira la iha dispensa kona-ba sira-nia obrigasaun saserdotal, husu de’it halo ho prudênsia.

Sétimu, ba konventu sira, semináriu sira no komunidade relijiozu no religioza sira bele hala’o selebrasaun ba de’it membru sira komunidade nian.

Sétimu orientasaun sira ne’e vigora dezde data de publikasaun (tersa, 24 marsu 2020) to’o mosu fali orientasaun seluk.

“Iha tempu susar hanesan ne’e, ita halo buat ne’ebé ita bele, buat ne’ebé ita labele, ita husik iha Maromak nia liman no husu ba sidadaun ida-idak atu hola responsabilidade ba povu hotu-hotu nia di’ak,” Dom Virgílio hateten.

Iha komunikadu ofisiál ne’ebé lee husi Dom Virgílio hateten katak, Moras Corona (COVID-19) pandemia ida ne’ebé nia virus hada’et ona ba mundu; kuaze nasaun hotu-hotu hetan ona virus ne’e.

“No, ita hotu hatene katak moras ne’e hadaet fasil liu bainhira ema barak halibur hamutuk. Hahú dia 21 de Marsu 2020 virus ne’e mós tama ona iha Timor-Leste. Ita hotu rona no hatene konsikuensia virus ida ne’e nian iha rai seluk, iha kontinente 5 ne’e nia laran,” bispu hateten.

Iha komunikadu ida uluk, Conferência Episcopal Timorense hasai ona orientasaun balu relasiona ho ita-nia selebrasaun sira misa nian. Haree ba realidade ikus nian iha nasaun sira no haree mós ba ita-nia realidade rasik, ho limitasaun sira ne’ebé mak ita iha, no rona hanoin sira Organizasaun Saúde Mundial, ita-nia tékniku saúde sira no mós desizaun Amu Papa nian no Conferência Episcopal sira seluk.

“Conferência Episcopal Timorense hakarak fó hanoin fali ba sarani sira hotu katak loos duni Amu Bispu sira iha responsabilidade ba fiar-nian, maibé Amu Bispu sira iha mós responsabilidade ba vida ema hotu nian, liuliu ba sarani Katólika iha Timor-Leste,” amu bispu dehan.

Tanba ne’e, Bibi atan ne’e hatutan, sasukat la’ós fiar forte, fiar fraku ou fiar la iha maibé sasukat ne’e mak povu Timor-Leste tomak nia saúde no nia moris.

“Maromak rasik fó matenek ba nia kriatura ema atu bele hetan dalan hodi hasees an hosi akontesimentu sira ne’ebé bele halo terus kriatura nu’udar ema. Nu’udár Maromak nia futar liafuan ne’ebé dehan; “Ha’u lakohi ema sira-nia mate maibé Ha’u hakarak sira konverte, atu hetan moris” (Ez. 18, 23). Haree ba razaun sira ne’e hotu no hatudu mós ita-nia komuñaun ho amu Papa no Igreja Universál, mak Bispi sira deside tuir orientasaun DECRETO PAPAL kona-ba Coronavirus (COVID-19),” Dom Virgilio esplika.

Komunikadu ofisiál Pastorál daruak ne’e asina husi Bispu Baucau no Sekretáriu Jerál CET, Dom Basílio do Nascimento, Arsebispu Dili no Pro-Prezidente CET, Dom Virgílio do Carmo da Silva, SDB, Bispu Maliana no Prezidente CET, Dom Norberto do Amaral.

Notísia Relevante: Igreja TL Fo Sai Regra Prevensaun COVID-19: Hadame Malu, Lalika Kaer Liman

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here