Prezidente Repúblika, Francisco Guterres Lú Olo, prezide reuniaun Konsellu Estadu iha Palásiu Prezidente Nicolau Lobato, Bairru Pite, Dili, Tersa, (24/03/2020). Imajen Tatoli/Egas Cristovão.

DILI, 24 marsu 2020 (TATOLI)–Xefe Kaza Sivíl Prezidénsia Repúblika, Francisco María de Vasconcelos hateten, bainhira deputadu Parlamentu Nasionál (PN) fó autorizasaun, maka, Prezidente Repúblika (PR), Francisco Guterres sei dekreta Proposta Estadu Emerjénsia husi Governu, liga ho COVID-19.

“Bainhira PN autoriza, Prezidente Repúblika sei dekreta Estadu Emerjénsia,” dehan Xefe Kaza Sivíl, Francisco María de Vasconcelos, ba jornalista sira hafoin akompaña reuniaun Konsellu Superiór Defeza no Seguransa (KSDS) ho Konsellu Estadu (KE) iha Palásiu Prezidensál Bairru Pité, Dili, tersa ne’e.

Nia dehan, ohin ka aban, Prezidente Repúblika (PR), Francisco Guterres “Lú Olo”, haruka proposta Estadu Emerjénsia ba Parlamentu Nasionál (PN) hodi husu autorizasaun atu xefe Estadu dekreta.

“Ohin duni ka tarde liu aban, sei haruka ba Parlamentu Nasionál, tanba ne’e urjente no Prezidente Repúblika sei Haruka ba Parlamentu Nasionál,” Xefe Kaza Sivíl ne’e esplika.

Entretantu, Reuniaun Konsellu Superior Defeza no Seguransa nian hahú iha tuku 9 dadeersan no termina iha tuku 11.00 no enkontru ho membru Konsellu Estadu hahú iha tuku 11:10 no ramata iha tuku 13:05.

Membru Konsellu Superior Defeza no Seguransa ne’ebé partisipa iha reuniaun ne’e mak Prezidente Repúblika Francisco Guterres “Lú Olo”, Primeiru-Ministru Taur Matan Ruak, Ministru Negosiu Estranjeiru no Kooperasaun Dionísio Babo, Ministru Defeza no Seguransa Filomeno Paixão, Ministru Justisa Manuel Carceres, husi Parlamentu Nasionál, Aderito Hugo da Costa, David Dias Ximenes, Xefe Estadu Maior Jeneral F-FDTL Lere Anan Timur, Komisáriu PNTL Faustino da Costa, no José Manuel Fernandes ‘Nakfilak’.

Membru Konsellu Estadu ne’ebé partisipa iha reuniaun ne’e maka, Prezidente Repúblika Francisco Guterres Lú Olo, Primeiru Ministru Taur Matan Ruak, Prezidente Parlamentu Nasionál Arão Noé, eis Prezidente Repúblika José Manuel Ramos Horta no membru ne’ebé nomea husi Prezidente Repúblika: Oscar Lima, Alcino de Araújo Barris, Maria Dadi Soares Magno, Laura Soares Abrantes, Faustino da Costa no nomea husi Parlamentu Nasionál: Eduardo de Deus ‘Dusae’, Aurora Ximenes, José Cornelio Guterres, Árcangelo de Jesus Gouveia Leite, José dos Santos ‘Naimori Bucar’, konvida mos Eis Primeiru-Ministru no Ministru Saúde Rui Araújo no Infectologista Daninha Coelho no Diretór Ezekutivu FONGTIL Daniel Santos.

Notísia Relevante: Ohin, Prezidente Repúblika Haruka Proposta Estadu Emerjénsia ba PN

Jornalista : Cipriano Colo

Editór     : Cancio Ximenes

HAKEREK NO HATÁN

Please enter your comment!
Please enter your name here